8 lak sha ka Balang Presbyterian Moorathud, `7 lak sha ka Mynkrem SC noh synniang u Dy.CM

By Mawphor Editor On Feb 10, 2026

Shillong, Rymphang 9: U Symbud Myntri Rangbah ka Jylla bad MLA ka Nartiang constituency u Ma Sniawbhalang Dhar mynta ka sngi u la noh synniang 8 lak tyngka sha ka Balang Presbyterian Moorathud bad 7 lak tyngka sha ka Mynkrem Sports Club.
Ka jingnoh synniang sha ka Balang ka dei ka jingthmu ban pynskhem ïa ka jingpyrshang jong ka Balang ha ka ban kyntiew bad ki kam pynïadei bad pynïajan ha ka imlang sahlang.
Haba kren haka program, u Ma Sniawbhalang u la ban jur ïa ka jingkular jong u ban kyrshan ïa ki shlem ai jinghikai kiba trei na ka bynta ka jingbha jong ka imlang sahlang.“Kane ka jingsynniang ka long ka jingpynshisha ïa ka jingaiti jong nga ban pynroi ïa ka jingïatylli, ka jingïaieid, bad ka jingïadei ba ïajan hapdeng ki paidbah” la ong u Ma Sniawbhalang.
Ki nongmihkhmat jong ka Balang ki la pynpaw ka jingsngewnguh na ka bynta ka jingkyrshan kaba biang por bad kaba donkam bha. “Ngi sngewnguh ïa ka jingaiei bad jingaiti jong u MLA u Ma Sniawbhalang na ka bynta ka bha ka miat jong ka imlang sahlang jong ngi” ki la ong.
La khmih lynti ba ka song pisa kan ïarap ïa ki projek pynroi bapher bapher jong ka imlang sahlang, kaba ai jingmyntoi ïa ka Balang bad ia ka imlang sahlang.
Ha kaba iadei pat bad ka Mynkrem Sport Club ka jingthmu ka long ba da kane ka Project kan pynbha ïa ka Madan Football ka kynthup ban sieh dieng kol, bad ban thaw ïa ka jaka kaba biang na ka bynta ki kam ïalehkai bad kilan met.
Haba ïadei bad kane ki nongïalam ka Mynkrem Sports Club ki la pynpaw ka jingsngewnguh ïa ka jingkyrshan jong u Ma Sniawbhalang da kaba ong, “Kane ka jingthmu ka wan ha ka por kaba biang, kaba pynpaw ïa ka jingangnud jong u ban kyntiew ïa ka jingïalehkai bad ka jingkiew jong ki samla ha ka thaiñ.”
Ki nongmihkhmat ki la ai khublei ruh ïa ka rukom treikam ba shimkhia jong u Ma Sniawbhalang da kaba ong, “Ka jingpyrshang jong u ka pyni ïa ka jingaiti jong u ban pynroi ïa ki sap jong ki samla bad ban pynshlur ïa ka jingïashim bynta jong ki ha ka imlang sahlang”.