8 lak mynta u snem, 30 lak la shem snem yn thung dieng

Shillong, Jylliew, 3: Ka sorkar jylla kan thung dieng kumba 8 lak tylli mynta ka snem bad la shem snem kan thung kumba 30 lak tynrai.
ïa kane la ïathuh da u Myntri ka tnad Khlaw, u James K. Sangma ha jingrakhe ïa ka taiew pynneh pynsah ïa ka mei mariang da ka Social Forestry & Environment Wing, Meghalaya ha ryngkat ka jingïatreilang bad ka Shillong Club, ka Department of Sociology jong ka Lady Keane College bad ka Education Department, NEHU ki la thung ïa ki tynrai dieng Cherry Blossom ha madan Golflink.
U Myntri ka tnat Forests & Environment u James P K Sangma u la long u Kongsan ha kaba la sakhi lang dang ki heh Ophisar jong ka tnat Forests, ki dkhot ka Shillong Golf Course, ki dkhot ka Shillong Club, ki kynhun bapher bapher, ki samla pule kiba la ïashim bynta ban thung ïa ki tynrai dieng.
U James Sangma haba kren kum u Kongsan u la ïaroh ïa ka sienjam ban thung ïa ki tynrai dieng ha ki sawdong sawkun jong ka madan Golflink bad bynrap ruh ba ka jingpynneh pynsah ïa ka jingjyrngam jong kane ka madan kaba don ha dohnud jong ka Sor Shillong ka long kaba kongsan bha khnang ba kan ïoh ïa ka nam kum ka madan ïaisah ha ka jingkup ïa ka dur ba jyrngam.
Ka jingthung ïa ki 1500 tylli ki tynrai dieng Cherry Blossom kan long kum u kyrwoh sha ki nongshong shnong ba ki dei ban phikir na ka jingkylla jong ka suiñ bneng, ong une u Myntri.
U la banjur ba ka jingïalap paidbah ban ïada mei mariang kam dei ban shu kut noh tang ha ka shi sngi hynrei ban buh jingmut ha ka jingim jong ngi kaba manla ka sngi. “Manla ka sngi ka dei ban long ka sngi kaba pynneh pynsah ïa ka mei mariang,” ong u Myntri haba kyntu ïa ki samla pule bad ïa ki nongïashim bynta ba ki dei ban kynmaw dngong ban ïada ïa ka metbneng pyrthei.
Haba pyntip ïa ka jingshisha ba ka jingdon jong ki khlaw hapoh ka jylla ka la hiar haduh 73 sq kms, u Myntri la ong ba ngi kum ki nongshong shnong ngi dei ban ïaid shakmat ban wad ïa ki lad ki lynti kumno ban ïakhun ïa ka jingkylla jong ka suiñ bneng.
U la ong ba ha kine ki lai snem ba la leit noh, ka Sorkar ka la wanrah ïa ki kyndon ban ïada ïa ki sawdong sawkun jong ka mei mariang. Halor kane ka bynta u Myntri u la ong ba ka Sorkar ka ju ïatreilang bad ki dorbar shnong ban ‘pyndonkam hi da ka mariang ban weng ïa ka jingeh jong ka mariang’ haba ai ïa ka nuksa ‘Phytoremediation method’ ban pynkhuid ïa ka Wah Lukha ha kaba la pyndonkam da u jingthung Algae ban pynkhuid ïa ka jingkylla bih jong ka wah bad ban ïarap ïa ka jinglong jingman jong ka wah.
U Myntri u la kyntu ïa iwei pa iwei ba kin don ka jingkitkhlieh da kaba ïatreilang bad ka Sorkar ban ïakhun pyrshah ïa ka jingkylla jong ka suiñ bneng da kaba pynneh pynsah ïa ki khlaw ki btap, ki um ki wah bad ban aiti ïalade kumno ban ïada ïa ka pyrthei kaba long kawei na ki metbneng ba kongsan na ka bynta u khun bynriew.
Ha kane ka sngi, la sam ïa ka khusnam Meghalaya Excellence Award for Environment Protection sha u Bah Tambor Lyngdoh jong ka shnong Dongiewrim Mawphlang halor ka jingtrei shitom jong u ban ïada bad ban pynneh pynsah ïa ki um ki wah bad ka mariang ha ki khlaw jong ki riewshimet bad ha ki khlaw shnong bad kumjuh ruh la ai ïa kane ka syrnod sha Ka Synjuk ki Hima Arliang Wah Umiam Mawphlang Welfare Society, Dongiewrim Mawphlang kaba la thaw ïa ka kynhun ka ban ai mynsiem ïa ki paidbah ban ïada ïa ka mariang bad ïa ki um ki wah. Kane ka kit ïa ka song pisa kaba T. 1 lak bad ka Momento.
La sam ruh ïa ki khusnam sha ki samla pule kiba ïashim bynta ha ka jingïakop dro, airong, thoh slogan bad kiwei kiwei.
Kiwei kiwei kiba la ai jingkren ki long u Principal Chief Conservator of Forests & HoFF u Bah B.K Lyngwa, u Director jong ka Shillong Club u Bah Hector Marweiñ bad u Chief Conservator of Forests (Social Forestry & Environment) Meghalaya u Bah W S Manners.