8 klur tam pyllait ka sorkar sha ka JHADC ban siew tulop shibnai ïa ki nongtrei

Jowai, Nohprah 17: Ka sorkar mynta ka sngi kala pyllait ïaka pisa sha ka JHADC kaba kot T.8,00,22,467 klur tyngka, na ka bynta ban siew ïa ka tulop ba shibnia ki nongtrei ka Council hadien ka jingmih ïakhih ka VPP da kaba khang tala ïa ka khyrdop jong ka JHADC.
U ma Jamshaphrang Pohtam uba dei u President ka VPP West Jaiñtia Hill ula ong kum ka seng VPP ha ryngkat ki 8 ngut ki MDC bad ki nongkitkam jong ka kila pynlong ïa kane ka jingïakhih namar ka jingduh tulop kaba 9 bnai lynter, da kaba pynshai ruh ïa kane ka jingdawa ka seng kala dep da ai jingthoh sha u CEM da kaba buh por ban pyntreikam haduh hynnin ka sngi 16 tarik u Nohprah.
Katba ka jingïakhih ka dang ïaibteng mynta ka sngi ula ong kaei pat kaba jia ka long ‘ba ki ophisar bad ki pulit kila wan dawa ban weng noh ïa ka jingïakhih da kaba ong ba ka pisa kala poi sha ka JHADC, haba pan jingshai pat ïa kane da ka jingthoh, hynrei kim lah ban pyni” ong u ma Pohtam.
Hynrei ha ka por jainmiet ki ophisar ka JHADC ha ryngkat u Deputy CEM ka JHADC ma Laski Rymbai kila khot bad pytikna ïa ki nongïalam ka VPP ba ka sorkar kala dep ban pynpoi mynta ka sngi ïa ka pisa kaba T.8,00,22,467 lynga ka tnad Treasury jong ka Council, kumta mardor hi kila weng noh ïa ka jingïakhih.
Ula pyntip nangne shakhmat ka Council kala pynbeit ban siew noh ïa ka tulop ki nongtrei da ka system kaba thymmai kata naduh u bnai Kyllalyngkot 2026, hynrei lada kane kam urlong na ka liang ka seng kan sa shim da kiwei pat ki lad jingïakhih kiba tyngeh.
U ma Jamshaphrang Pohtam ula ong kane ka tulop ba shibnai ka long tang kumba ai mynsiem ïa ki nongtrei ka Council ban kin ïoh pyndonkam khamtam ha une bnai Christmas bad snem thymmai.
La sakhi mynta ka sngi kiba bun na ki nongtrei jong ka Council kila wan ban ai jingkyrshan lang da kaba shong myngngor haki lyngti ïaid kjat kiba don mar pyrshah ka JHADC kum ka dak ban kyrshan ïa kane ka jingïakhih.