8.97 gram u drok kurup ki Pulit ANTF na ïew Polo, shah kem 37 ngut

Shillong, Nailar, 09: Ka kynhun ki Pulit Anti Narcotic Task Force jong ka East Khasi Hills District kiba la pynlong ka jingkhynra ha Iew polo ha ka sngi baar ki la ïoh bat ïa kawei ka kynthei bad san ngut ki shynrang ïa kiba la kynnoh ba ki dei kiba donkti ha ka kam khaii drok.
Na ka met jong kine ki san ngut ki Pulit ki la ïoh kurup 105 tylli ki tyndong plastik barit ba la thep ïa u drok uba khia 8.97 gram. Nalor kata, ki Pulit ki la ïoh kurup ruh 286.93 gram u kynja, 20 song u dawai kuli Nitrazapam, 330 tylli ki tyndong plastik ba thylli ba la pyndonkam ban thep ïa u drok, 10 tylli ki thyrnia injek, 3 tylli ki tin thep duma Golden ba thylli, 6 tylli ki Mobile Phone, kawei ka Scooty, 2 tylli ki kali Local Taxi bad ka pisa kaba kot haduh 1,49,280 lak.
Ha kane ka jingkhynra, 27 ngut ki nongdih drok kiba dang wan thied drok na Iew Polo ki la shah bat ha ki Pulit.
Napdeng kine kiba la shah bat ki dei kiba la shah thep kyndon hapoh ka Rynjah Police Station bad kiba la shah pynngat hapoh ka kyndon aiñ 454/380 jong ka Indian Penal Code (IPC) namar ka jingphet tuh na Civil Hospital Covid Ward ha ka 6 tarik mynta u bnai.
Saw ngut ki kynthei kiba la pynwit ïa ki Pulit katba ki dang trei la ka kamram ki la shah rah lang sha Thanat ynda la kut ka jingkhynra.
Katkum u kyrwoh ba la phah da u Superintendent of Police ka East Khasi Hills District, la pyntip ba haduh 5 ngut ki kynthei bad 32 ngut ki shynrang ki la shah kem bad ïa kiba la shah kem baroh la pyngngat hapoh ki kyndon jong ka NDPS Act bad ha kiwei de ki kyndon jong ka aiñ.