782 ngut kiba im bad u ñiangkulia ha Ri-Bhoi, bun ki mad ka jingshah ibeiñ haka imlang ka sahlang
Shillong, Nohprah 02 : Ka ophis jong ka District AIDS Control Officer, Ri-Bhoi District mynta ka sngi kala rakhe ïaka World AIDS Day, daka jingangnud ban pynphriang ïaka khubor halor ka jingma jong u khñiang jingpang ñiangkulia ne HIV bad ban pynshai ruh sha ki paidbah ïaki lad jingïada na une u khñiang jingpang ha ka jingïalang kaba la pynlong ha Science Hall.
Ha kane ka sngi u Bah Sosthenes Sohtun Myntri ka tnad C&RD ka sorkar jylla ba dei ruh u MLA bad MDC ka Jirang u la shim bynta kum u kongsan haka jingdonlang u Abhilash Baranwal, Deputy Commissioner ka Ri Bhoi kum u symbud kongsan, ka Dr. E Kalwing District AIDS Control Officer Ri Bhoi District, ki samla pule nurse lem bad kiwei kiwei..
Lyngba kane ka sngi la ioh ruh ban pynsaphriang ïaki khubor halor ka jingma une u khñiang jingpang ba ngi lah ban ioh naka jingthiah lok ba khlem jingïada, ka jingpyndonkam da u juh u thyrñia injek bad kiwei kiwei lem bad ki dak ki shin ba paw shabar haba ki briew ki ioh ïa une u khñiang jingpang bad khamtam lyngba kane ka sngi ka long ruh ka khubor sha ki paidbah ba kim dei ban ibeiñ ne ñiewbeiñ ïaki briew ba ioh ïa utei u khñiang jingpang hynrei ban ai mynsiem ïaki bad ban pynshlur ba kidei ban leit sha ki jaka sumar bad ban dih tista ïaki dawai kumba la bthah da ki doctor.
Haba kren ha kane ka sngi naka liang ka Dr E Kalwing kala pyntip ba tang ha Ri-Bhoi District haduh mynta ki don kumba 782 ngut kiba im bad utei u khñiang jingpang, 364 ngut ki dei kiba la sdang ban koit bad 480 ki dei kiba dang don hapdeng ka jingshah sumar.
Kala ong ruh ba ki briew kiba im bad u HIV bunsien ki mad ïa ka jingshah ibeiñ ym namar ba ka jingpang kam lah ban pynkoit hynrei namar ba ka imlang sahlang ka dang sahdien ka rukom pyrkhat pyrdaiñ namar u HIV um batai ïa u briew, hynrei ka jingshah ibein ka kham pynsniew ban ïa utei u khñiang jingpang.
Shuh shuh ka tnad ka koit ka khiah ka don ruh ka thong ban rat diengkhong ïa kane ka jingpang ba dei tang lada ki paidbah naduh ki nongïalam shnong, ki nongïalam ñiam lem bad ki kynhun bapher bapher ki mih shakhmat ban ai ka kti ka mon kadiang ban rat diengkhong ïa kane ka jingpang.