77 lak ai jingïarap u Syiem Langrin da ka pisa jong ka Hima sha ka Balang, bitar ka Seng Samla

Langrin, Jylliew 06: Ka Seng Samla Hima Langrin, ka la pynpaw ka jingsngew kyndit kaba khraw ïa ka jingleh u Syiem ka Hima Langrin, u Paiem Naitei Syiemïong, ha kaba u la sei ïa ka pisa jong ka Hima haduh 77 lak tyngka ban ai jingïarap sha kawei ka Balang na ka bynta ki kam mishon jong ka Balang.
Katkum ka kyrwoh ba la pyllait da u Bah PS Lyngdoh, President jong ka Seng, la ong ba ïa kane u la pynsngew paidbah ha ka Dorbar jong ka Hima kaba la long ha ka 26 tarik u bnai Jymmang 2023 ha Phlangdiloiñ.
Ka Seng Samla ka la kynnoh ba u Syiem u la leh ïa kane khlem da kynjoh ktien ne ïoh jingbit na ka Dorbar jong ka Hima, hynrei la nang leh hi bad sa pyntip pat ha ka Dorbar, kaba long ka jingpynkheiñ ïa ki kyndon treikam jong ka Hima.
Ha kajuh ka por ka Seng ka ong ba lada u Syiem u kwah ban ai jingïarap sha kano kano ka Kynhun Balang u lah ban ai, hynrei um dei pat ban shim na ka pisa jong ka Hima, namar ha Hima Langrin dang bun bah ki longïing kiba duk kiba suk kiba kamai kyndoi jakpoh.
Shuh shuh ka Seng Samla ka buh ka jingkylli ïa ka Balang kaba ïoh pdiang ïa kane ka jingïarap na u Syiem, hato ka nud ban pdiang ïa kane ka jingïarap da ka lynti ka bym khuid ka bym dei?.
Ka Seng ka ong ruh ba ha katei ka Dorbar, u Syiem u la leh bym suidñiew ïa ki Khun ki hajar ka Hima da kaba ong ba lada don ki bym ïahap bad kane ka jingleh ki lah ban leit sha Supreme Court.