Mawkyrwat, ‘Nailar 08: Ka Meghalaya State Skills Development Society (MSSDS) ka tnad treikam kaba don hapoh jong ka South West Khasi Hills District ha ka sngi Thohdieng ka la ïoh ban plie pyrda ïa ki lad jingai jinghikai na ka bynta ki samla shynrang bad kynthei, bad kumjuh ruh ïa ki longkmie ba kin ïoh ki lad jinghikai ha ki bynta bapher bapher ba la dep ban pynbeit kyrpang bad ki da buh ruh ka thong ba mynta u snem 2025 – 2026 kin don haduh 35 tylli ki jait jinghikai ba la kyrshan da ka Sorkar Meghalaya.
Lah ban kdew ba ïa ki klas ai jinghikai ynsa hikai ha ki 7 tylli ki Training Provider ne Training Centre na ka bynta ki 760 ngut ki nongshah hikai ne ki samla ryngkat ki longkmie.
Ka jingthmu jong kane ka program ka long ban kham pyntbit shuh shuh lyngba ki lad jinghikai, ban pynshlur ba kin ïeng ha la ki jong ki kjat bad ba kin lah ruh ban seng ki kam la jong na ka bynta ki samla shynrang bad kynthei bad kumjuh ruh ïa ki longkmie longkpa kiba don jingthmu ban kyrshan ïa lade lyngba ki kam ynda ki la ïoh ki jinghikai.
Ïa kitei ki klas ban ai jinghikai la plie paidbah ha Training Hall GCIITs Centre, Mawkyrwat da u Deputy Commissioner ka South West Khasi Hills District Bah B. Mawlong, uba la long kum u kongsan.
Haba kren ha ka jingïalang u Bah Mawlong u la pynshlur ïa ki samla bad kumjuh ruh ïa ki longkmie ba ha kum kane ka juk ka long kaba eh than ban ïoh ki kam kiba biang kumta ka la dei ka por ba kin ïa beh ïa kum kine ki jait training khnang ba kin lah ban ïoh ei ei da ka jingthmu ba kin lah ban seng ïa ki kam la jong bad ba kin ïeng ha la ki jong ki kjat.
U la ai jingmut ruh ïa ki ba haba ki wan ha ki jingshah hikai kim dei ban wan tang dep rukom hynrei ki dei ban buh ïa ka thong ba ynda ki la pyndep kin lah ban long ei ei hadien habud. U la ong ruh ba ha kum kine ki sngi, ki don ruh ban long kiba briew kiba trei shitom ryngkat ka jingkut jingmut, ki dei ban don ïa ka mynsiem ban ïarap lem na ka bynta kito kiba donkam lyngba ka jingplie jong ki nongshah hikai kum ïa ki dukan bad kiwei de ki bynta.
Ban pynshai shuh shuh, u Bah B. Mawlong u la ban jur ba da ka jingdon ki shlem ai jinghikai kan nang pynbha shuh shuh ïa ki nongwan shah hikai kiba la don jingtip ba malu mala la ha kino kino ki jait kam.
Kiwei kiba la ïadonlang ki long ka Kong U. Kharlyngdoh, Skill Development Officer, Meghalaya State Skills Development Society (MSSDS), South West Khasi Hills District, u bah V.W. Nongsiej, Executive Director jong ka GCIITs Society lem bad kiwei de.
