New Delhi, Naitung, 12: Ka tnat Expenditure, jong ka tnat Kam Pla Tyngka ha ka sngi Balang ka la pyllait pisa T. 7,532 klur sha 22 tylli ki Sorkar Jylla na ka bynta ki State Disaster Response Fund (SDRF). Ïa kane ka pisa la pyllait katkum ka jingai jingmut jong ka tnat Kam Pohiing.
Ka Meghalaya ka la ïoh bhah T. 27.20 klur.
Namar ka jingjur slap ha kylleng ka ri, la pynjem ïa ki kyndon bad la pyllait ïa ka pisa kum ka jingai jingïarap kaba mardor ïa ki jylla khlem da ap ïa ki utilisation certificate jong ka pisa ba la pyllait sha ki jylla ha u snem mang tyngka ba la dep.
La thaw ïa ki State Disaster Response Fund (SDRF) ha manla ki jylla hapoh ka Section 48 (1) (a) jong ka Disaster Management Act, 2005. Kane ka pisa ka dei kaba don bad ki Sorkar jylla ban ai jingïarap haba don ki jingjia lynshop ka mariang. Ka Sorkar Pdeng ka ai ka bynta kaba 75% sha ki SDRF ha ki jylla bad 90% ha ki jylla ka thaiñ shatei lammihngi bad ki jylla ha ki thaiñ Himalaya.
Ïa ka bynta jong ka Sorkar ha ka shi snem la pyllait ha ki ar bynta katkum ki jingai jingmut ka Finance Commission. Katkum ki kyndon, ka jingpyllait pisa ka wan hadien ba la ïoh ïa ka Utilisation Certificate jong ka pisa ba la pyllait ha ka bynta kaba la dep bad hadien ba la ïoh ïa ka kaiphod na ka Sorkar Jylla halor ki kam ba la trei da ka SDRF. Hynrei, namar ka jingkyrkieh, la weng shipor ïa kine ki jingdonkam haba la pyllait pisa mynta ka kynti.
Ïa ka SDRF yn pyndonkam tang ha ka jingpynlut haba ai jingïarap mardor ïa kito kiba shah ktah ha ki jingjia lynshop bapher bapher jong ka mariang kum ka eriong, ka jingkyrduh um, u jumai, jingpluh ding, tsunami, jinghap phria, jingtwa khyndew, cloud burst, ka jingpynjulor ki khniang bad ka jingkhriat tasam.
Ka jingai ïa ka pisa SDRF sha ki jylla ka don nongrim ha ki bynta bapher bapher kum ki jingpynlut ba mynshuwa, ka jaka, ka jingdon ki briew bad ka jingma na ki jingjia lynshop ka mariang. Kine ki bynta ki pyni ïa ka jinglah treikam ki jylla, ki jingma ba ki ïakynduh bad ki jingma ba don.
Katkum ki jingai jingmut ka 15th Finance Commission, ka Sorkar Pdeng ka la mang T. 1,28,122.40 klur ïa ka SDRF na ka bynta ki snem 2021-22 haduh 2025-26. Na kane, ka bynta jong ka Sorkar Pdeng ka long T. 98,080.80 klur. Ka Sorkar Pdeng ka la dep pyllait haduh T. 34,140.00 klur shuwa kane ka jingpyllait pisa. Ha ryngkat kane ka jingpyllait pisa mynta, baroh ka bynta jong ka Sorkar ha ka SDRF ba la pyllait sha ki Sorkar Jylla haduh mynta ka long T. 42,366 klur.
