Shillong, Naitung, 02: Ka All India Radio, Shillong ka la rakhe ïa ka sngi seng kaba 75 mynta ka sngi ha Shillong ha ryngkat ki nongtrei bad ki ophisar barim jong kane ka station.
La plié ïa ka All India Radio Shillong ha ka 1 tarik u Naitung 1948 da u Lat barim ka Jylla Assam, u Akbar Hydari ha ka jingdon ryngkat u Myntri Rangbah barim ka Assam, u Gopinath Bordoloi. U Laxmanan Narayan u la long u Director-General ka All India Radio ha katei ka por.
U Director bad Head of Office, AIR Shillong, u T. Hynniewta u la ai jingkren shaphang ki kam ka AIR Shillong ha ki snem ba la dep ban ai jingtip ïa ki briew bad ruh ban pynbiang ïa ki prokram pynbyrnia. U la ong ba ka AIR Shillong ka la pynskhem ïalade kum ka kynhun kaba don burom kaba ai jingtip kaba la pynshisha lyngba ka jingtrei shitom jong ki briew bapher bapher ba kynthup ruh ïa ki ophisar bad ki nongtrei ba la shongthait mynta. U la ïaroh ïa ki sienjam jong baroh ki nongtrei mynta bad kito kiba la shongthait kiba la don bynta ha ka kam jong ka All India Radio kum ka ‘Public Service Broadcaster’. U la kren ruh shaphang ki sienjam jong ka AIR Shillong ban pynbiang ïa ki jingdonkam jong ki nongsngap kiba dang samla kum ka jing stream ïa ki prokram lyngba ki lad online lyngba ka social media bad ki app bapher bapher.
Ka Chief Producer barim jong ka Doordarshan, ka Sweety S Diengdoh ka la ong ba ka dap da ka jingkmen ba ka AIR Shillong ka la noh synniang shisha ban pynbiang ïa ki prokram pynbyrnia bad ruh ban ai jingtip ïa ki briew jong ka Meghalaya. Ka la kyntu ïa ka station ba kan bteng ïa ka kam kaba bha kum ka ‘Public Service Broadcaster’. Ha kajuh ka por, ka Deputy Director-General Program barim jong ka AIR Shillong, ka Narimon Shadap ka la ong ba namar ka jingbun kiwei kiwei ki lad pathai khubor, ka All India Radio ka dei ban don ha ka jong ka kyrdan da kaba pynbiang ïa ki khubor bad ki jingpyntip kiba la pynshisha.
Ka All India Radio, Shillong kan pynlong ïa ki prokram bapher bapher baroh shi snem haduh ka 1 tarik u Naitung 2023 kum shi bynta jong ka jingrakhe ïa ka jingdap 75 snem ka jingai jingshakri kum ka ‘Public Service Broadcaster’ ha kaba ki briew bad ki khynnah skul kin ïashim bynta ha kine ki prokram.
