Nongstoiñ, Naitung, 30: U bah Witting Mawsor MLA barim ka Mawshynrut konstitwensi, u ba bat ruh kum u vice President ka seng HSPDP seng kmie, mynba u dang long kum u MLA jong katei ka thaiñ, u la ju kren man ka por shaphang ka surok bah kaba naduh Nongstoiñ, Maweit ter ter shaduh Kulang kaba jngai kumba 75 km ei ei.
Haba ïadei bad kane ka phang, u la ong ba u da angnud shisha haduh katta katta ban pynurlong ïa katei ka surok. U la ong ruh ba u la ju leit khah khah shaduh nongbah Delhi ban pyntikna ïa katei ka surok.
Mynta ka kynti pat u la ong ba u bah Gigur Myrthong MLA ba thymmai ka konstitwensi, u dei ban leit buddien ïa kaei kaba u la sdang. U la ong ruh ba kaba phylla ka long ba mynta pat, na ka 75 km ka la kylla 35 km bad na ka 35 km sha ka 22 km. U la ong ruh ba kumba la ïohi hi mynta lei lei ka dei satang kata ka surok barit lane Intermediate Lane.
“Ha ka jingshisha nga la dep pyntikna wat ïa ka DPR ruh lah dep satang ban khot tender noh. Hynrei mynta ka la long ka jingduhnong kaba khraw ïa ka thaiñ haba duh noh ïa ka surok bah two lane”, u la ong.
