Ka aïom Khristmas bad ka dheng kali kat shaba phai
Ka nongbah Shillong ha kine ki khyndiat sngi
ka la mad ïa ka dheng kali kaba jur kaba la buh ha ka jingeh kaba khraw ïa ki nongleit nongwan la ka long naduh kiba wan na ki thaiñ Ri Bhoi, thaiñ Jowai, thaiñ Sohra bad ruh na ki bynta jong ka West Khasi Hills kaba la poi haduh u pud ba ki paidbah ki hap ban pynlut da ki kynta kynta ban poi sha ki kam ki jam jong ki.
Dang ha kine ki shisngi arsngi la ïoh ba kane ka ka dheng kali ka la nang jur arshah namar bun ki paidbah ki ïabeh ban leit thied riam thied beit ïalade bad ruh na bynta ban pynphuh pynphyrnai ïa ki ïing ki sem. Kane ka dheng kali lehse lah ban ong ba kadei na ka jingnang bun ki kali bad ruh na ka daw ka jingbym don shuh ki jaka pynïeng kali kiba biang ha kylleng ki bynta jong ka nongbah.
Ka por ka dawa ba ka sorkar ka la dei ban pyrshang noh da ki lad ki lynti kumno ban wanrah noh da ki fly-over ha kito ki jaka ba kham jur ka dheng kali khamtam eh ha ki jaka ba kham long pdeng kum ha ki bynta jong ka Barik, Jingkieng Mawlai bad ruh wat ha ki bynta jong ka Umshyrpi. Kaba kham pynisih eh kadei ba ha ki por ba don ka dheng kali, wat ki ambulance ba ïaid ruh ki shem jingeh ban ïoh rung napdeng.
Na ka liang ka sorkar kam dei shuh ban pynslem hynrei ka la dei ban buh kham bun ki jaka pynïeng kali kiba kham kylluid bad ruh ban kham pynheh ïa ka surok kumba ka buh thong mynta ban pyndep noh kham kloi ia ka jingpynheh ïa ka surok na Shillong sha Dawki.
Kan ym don jingmut ban pynheh ïa ka surok pajih na sor lada ki surok hapoh ka nongbah pat ki long kiba rit bad kiba khim. Donkam ruh ïa ki bor ba dei peit ba kin shimkhia wat ban pynkynriah noh ïa ki ïewdie lang pajih na pdeng sor. Lehse da kaba leh kumta, ka jingrung ki kali heh ba kit ïa ki mar rep kin ym donkam shuh ban rung shapoh Ïewduh hynrei beit beit sha kito ki jaka ba la buh kyrpang.
Lah ruh ban ong ba ka jingdon tang kawei ka jaka ba long ïew kumba long ha Ïew Themawlong bad ha Khyndailad kadei ka dawbah kaba pynlong ïa ka dheng kali kaba jur namar baroh la shu ïa poi lut hajuh. Jin lada ka long kaba lah ba ïa ki ïew jhur ïew doh lane ki ïew jain ïew nep kin long ha ki jong ki jong ki jaka khlem artatien kata ruh kan ïarap ïa ka dheng kali. Kane baroh ka shong ha ka jingshemphang jong ka sorkar kumno ban leh ryngkat ryngkat ka jingïatrei lang bad ka District Council bad ruh ka Hima Mylliem namar tang ka sorkar marwei hi kan ym lah ban leh ei ei lada kam don ka jingïatrei lang.
Lehse mynta la ba jan ka elekshon, bun ki party kiban ïa kam ban leh ïa kane ban leh ïa katai hynrei kaba khatduh hi ka long ba donkam ïa ka mon ban leh shisha ym ban shu kam tang ha ki mat ïakhun elekshon lane ha ki manifesto. Ka jinglong jingman ha nongbah Shillong mynta ka la nang syrtok bad ym lah ban tip ba ha ki snem ban wan lei kaei shuh kaban jia. Lada peit naduh dang step ka dheng kali ka la sdang bad kane ka kham jur ynda la dei ka por leit skul bad kan ïai bteng tad haduh ban da poi ka por 11.30 ne 12:00 ba la poi lut ki nongtrei sorkar sha ki jaka trei jong ki. Nangto pat la sdang biang ka dheng kali naduh ka por 2:00 baje janmiet ter ter haduh ka por 5baje ne 5 tam ba la wai trei.
Kane hi ka la ktah ymtang ïa ki nongleit nongwan hynrei khamtam eh ïa kito ki kali kamai kiba im ja na kaba kamai taksi. Na kaei kaba ïohi hi lah ban ong ba ka jingdon tang kawei ka kynja iew ha pdeng jong ka nongbah kadei ka daw kaba ktah haduh katta katta ïa ka jingïaid beit ïaid ryntih ki kali. Lehse lada ka sorkar ka thmu shisha, ka lah ban pynkohnguh ba ki dukan kiba heh dei ban don noh kum sha New Shillong ne ki jaka ba marjan lehse katei ka dheng kali kan long noh da kumwei pat.
Lah ruh ban ong ba ka jingdon ki jaka pule ha kajuh ka thain kadei kawei ruh ka daw jong ka dheng kali ha kajuh ka jaka khamtam naba kitei baroh ki don ha rud ka surok bah. Ban weng ïa kine ki jingeh baroh, ka shong ha ka jingstad jong ka sorkar bad ka por ka la dawa ba dei ban leh noh kyrkieh khnang ba ka leit ka wan ha ki khyndiat snem ban kan ym mad ïa ka jingïa mai ïa nia, ka jingïatim ïatla hapdeng ki nongniah kali. Kane lada ym lah ban pynbeit ka lah ban poi haduh u pud ba ki khun ki kti kin ym lah shuh ban poi sha ki skul ha ka por kaba biang, ki nongtrei sorkar kin ym lah ban poi sha ophis ha ka por ba la buh bad kaba buh jingma eh ka long kan ktah wat ïa ka ïap ka im jong ki paidbah namar ki kali kit nongpang kin ym lah shuh ban ïaid da kaba suk ha kum katei ka por ban poi sha ki jaka ai jingsumar.