700 spah tam ki khynnah skul kiba ïashim bynta ha ka ‘Career Guidance Seminar’
Jowai, Nailar 23: Palat 700 ngut ki khynnah skul kiba wan sha ka ‘Career Guidance Seminar’ ba la pynlong daka ophis jong u Deputy Commissioner ka West Jaiñtia Hills kaba la long ha ka sngi Thohdieng ha District Library Auditorium, Mynthong, Jowai ha ryngkat ka jingïatreilang bad ka SPM IAS Academy, Guwahati.
Ha kane ka prokram ki khynnah skul na kylleng ka District ki la wan khnang sha kane ka prokram ban ïoh shibun ki jingtip kiba khambniah bad ki jingshemphang ha ki jingpule kiba kham shalor na ka bynta ka lawei ba phyrnai.
Ha kane ka sngi la wan ban donlang da u MLA ka Jowai bad u Chairman ka MUDA ma Wailadmiki Shylla, u Deputy Commissioner Shri Abhinav Kumar Singh, IAS, Superintendent of Police Jaspal Singh Dhanoa, IPS, u District & Session Judge ka WJH u N.A Khan, MHJS nalor kiwei de kiba la shah khot sngewbha.
Ïa ki kyntien pdiang sngewbha ïa baroh ki nongwan la ai da u Deputy Commissioner Abhinav Kumar Singh, uba la kyntu ruh ïa ki khynnah skul ba kin long kiba shemphang bad kiba pyndonkam hok ïa ki jingtip kiba la ïoh ha kane ka sngi lyngba ki riew shemphang.
U ma Wailadmiki Shylla, ha ka jingkren ula ai mynsiem ïa ki khynnah skul ban kin long kiba ïakhun ïa ka jingstad jong kane ka juk ba mynta lyngba ka Artificial intelligence (AI) kaba la dawa bha ha kiba bun ki liang.
Shuh shuh la kyntu ïa ki khynnah skul ba kin tip kumno ban jied ïa ki laiñ pule lada long ha ka kam Doctors, Engineers lane ki nongtrei sorkar, hynrei u kyntu jur lyngba kane ka prokram kan ïarap shibun eh ïa ki khynnah skul ban kin nang ban jied dalade ha kano ka sap ba ki don. U la ban jur ïa ka jingdonkam ban tip ïa ki jingjia kiba thymmai ha ka imlang sahlang bad ha ka pyrthei hi baroh kawei.
Ha kane ka sngi u ma Wailadmiki Shylla ula aiti ïa ka cheque kaba Rs.1 lakh tyngka sha u Deiwitawan Synnah, uwei na ki nongrwai ba paw ka District uba la synñiang shibun ha ka liang ka rwai ka siaw bad shibynta ruh na ka jingthmu jong u ban seng ïa ka shlem ai jinghikai ha ka rwai ka siaw.
Kiwei de kiba ai jingkren ki kynthup ïa u Judge N. A. Khan bad u SP ka District u Jaspal Singh Dhanoa. Ïa kane ka Seminar la pynïaid da u Hridesh Kumar Shrotriya Director of SPM & Lalan’s Guwahati bad ka kynhun jong u, kiba la ai shibun ki jingtip sha ki khynnah skul ha ryngkat ka jingïaphylliew jingmut lang.