Shillong, Ïaïong, 19: Bun tylli ki jingjia kiba sngewsih ki la jia ha ka Easter Monday ha ki bynta bapher bapher ka rilum Garo.
Manla u snem, hadien ka jingrakhe ïa ka Easter Sunday, ki jaidbynriew Garo, ha ka sngi kaba bud ki ju leit bam khana shiing shi sem. Hynrei mynta u snem ki la mih pynban ki jingjia ba sngewsih.
Kane ka jingjia, ka long hadien ba uwei u samla lud uba la 16 snem u Niksrap Sangma na Gondenggre u la jah rngai na Rongkem kaba don hajan ka shnong Samanda ha Wah Simsang jong ka Williamnagar katba u dang leit jngi ha ka jingleit bam khana bad la ki paralok. Ki Pulit ka tnat Fire Service kiba la ïoh jingtip halor kane ki la hiar ban leit ai jingïarap mar mar.
Ka tyllong khubor ka ïathuh ba ïa ka met jong une u khynnah la lap hadien bun kynta ba la wad.
Sa uwei pat u khynnah na Denggasi, Garobada u la jah ha shnat wah jong ka Ganol ha Wah Damalgre. Sa uwei pat u khynnah u la duhei ïa la ka jingim hadien ba la btuit na ka kshaid Nawaldare.
Ha South Garo Hills uwei u samla uba la tip kyrteng kum u Clistzer Marak u la ngam jyllop ha Emangre Fish Sanctuary, ha Wah Aginma.
Sa kawei pat ka jingjia, ka la jia ha Wah Chichra Manda Chibima, Rongchong Wa·geasi jong ka North Garo Hills. Ïa une u samla la tip kyrteng kum u Senja D. Shira na Damas.
Nalor kata, la ïathuh ruh ba ki la don ki jingjia aksiden ha Dobu- East Garo Hills, ha Watregre-Jengjal, ha Darugre-Rongjeng.
