7 ngut yn mihkhmat ki nongïalehkai Muay Thai ka jylla ïa ka ri India sha ka World Championship ha Malaysia

Shillong, Nailar 03 : Ki hynñiew ngut ki rang bad thei ïalehkai Muay Thai jong ka jylla shen kin sa leit ban ïashim bynta ban mihkhmat ïa ka ri India sha ka rynsan ïalehkai jong ka World Muay Thai Championship kaban long ha Kuala Lumpur, Malaysia kaban sdang naduh ka 9 tarik haduh ka 21 tarik Nailar 2022.
Ki hynñiew ngut kiban sa leit ban aireng sha katei ka rynsan ki kynthup ïa saw ngut ki kynthei, i heprit Alfonsia Riang ban sa ïashim bynta ha ka kyrdan ïakhun ba 35kg (12-13 snem), Mary Christine Riang 38kg (14-15 snem), Naphilawanbet Nongspung 45kg (14-15 snem) bad i Aitibanteilin Kharumnuid ha ka kyrdan jingkhia ba 51kg (14-15 snem). Katba ki shynrang ki kynthup ïa u Everestar Lyngdoh ban sa ïakhun ha ka jingkhia ba 48kg (14-15 snem), Mamesha Marten 42kg (12-13 snem) bad u Bansahnamkyrpang Warkhyllew ha ka kyrdan jingkhia ba 45kg (14-15 snem).
Haba pynbna ïa kane ha ka sngi Balang ha Shillong Press Club u Bah Angelus Sun President ka Muay Thai Association of Meghalaya (MTAM) u la ïathuh ba kitei ki khynnah ïalehkai kin mih na la ka jong ka jylla ha ka 9 tarik Nailar 2022. U la ïathuh ba na ka association la shah jied phra ngut hynrei iwei i khlem ïoh ban leit ïashim bynta namar ha ka World Championship namar ym shym la don ka kyrdan ïakhun.
U la pynpaw ruh ba dang shen ki samla jong ka jylla ki la wan rah nam bad burom ïa ka jylla ha kaba ki arngut ki nongïalehkai ba kynthup ïa u Pynnehbor Mylliemngap bad u Blaseibok Kharbuli kiba la khur ïa ka takma rnong na ka rysan ïalehkai kaba la tip kum ka Senior World Muay Thai Championship kaba la long ha Abu Dabi.
Ha ka jingleit ïashim bynta sha Malysia, u President u la ïathuh ba ka association ka la don hapdeng ka jingdukha mynsiem khamtam ha kaba ïadei bad ka jinglut jingsep, hynrei ka association ka pynpaw ka jingai khublei ïa ka sorkar jylla kaba la kner ki kti jingïarap da ka song pisa kaba kot sha ka 13 lak tyngka sha ka asscociation ba kan ïalam ïa ki khynnah ban leit mihkhmat ïa ka ri India sha katei ka lympung bah.
“Ngi la don hapdeng ka jingtieng ïoh ngi duh ïashim bynta, hynrei lyngba ka jingïarap u Myntri ka tnad sport Bah Banteidor Lyngdoh, Bah Jasong Mawlong MLA ka Umsning, tnad sport, Vijay Kumar bad khamtam eh u Myntri Rangbah ngi la sngew shngaiñ bad kyrmen skhem ba ki khynnah jong ngi kin wanrah ïa ka nam bad burom ïa ka jylla hi baroh kawei,” ong u Bah Angelus Sun.