Rambrai, Naitung, 31: Hadien bun bun snem jong ka jingïai dawa na ki paidbah ka Rambrai ban ïoh noh la ka jong ka C&RD Block, hynrei mynta katei ka jingdawa ka lah ban urlong noh shen, namar u Bah Prestone Tynsong symbud myntri rangbah ka Jylla, u hïar dalade ha Rambrai ban pynbna ba ka sorkar kan pynurlong noh ïa katei ka jingdawa.
Ïa kane ka jingpynbna na ka liang u Bah Prestone Tynsong, u la pynpaw ha ka sngi saitjaiñ ha ka jingïalang bah jong ka party NPP ha Rambrai, ha kaba la donlang da ki riew pawkhmat naduh u local MLA Bah Kimfa Marbaniang, MDC Bah Bajop Pyngrope, Bah M.Byrsat MLA Nongstoiñ, Bah Gigur Myrthong MLA Mawshynrut bad kiwei kiwei de.
U Bah Prestone Tyngsong Symbud Myntri Rangbah ka sorkar jylla Meghalaya, u la pynbna paidbah ruh ba ïa ka Mawshynrut yn ai noh ka PWD ophis. Ha kajuh ka por u la ong ruh ba ka Rambrai Jyrngam konstitwensi kan ïoh noh ïa la ka block ophis haduh 2 tylli, kaba kynthup ha Rambrai bad ha ka shnong Nonglang kawei na ki shnong kaba sha ka thaiñ Langpih.
U symbud myntri rangbah ka sorkar u la pynbna paidbah ruh ïa ki katto katne tylli ki surok kiba yn sanction noh shen. U la ong ba kitei ki surok ki kynthup ïa ka surok kaba na Mawrang to Rambrai kaba kot sha ki 2 kilomitar shiteng bad kawei kaba sha Langpih shen yn sanction noh bad ki surok PMGSY kaba na Mawlangsu sha Mawthungmarwei. Kumta tang shu ïoh sanction yn khot tender noh bad u la ong ruh ba u la ïohi ïa ki jingeh jong ka thaiñ haba ïadei bad ka surok kaba dei ruh kawei na ki mad kaba kongsan ïa ki paidbah.
U Bah Macmillan Byrsat MLA ka Nongstoiñ konstitwensi haba ai jingkren ha katei ka sngi, u la takraiñ tyngeh ïa ka seng Congress kaba la synshar ïa ka jylla Meghalaya da ki bun phew tylli ki snem. U la ong ba ka sorkar kaba la ïalam da u Dr.Mukul Sangma kam donkam ïa ka ILP, hynrei ka sorkar MDA pat ka la rai wat ha ka ïing dorbar thaw aiñ.
Ym tang katta hynrei u la ong ba katei ka juh ka sorkar ka la ibeiñ ïa ka seng kieng atiar kaba la tip kum ka HNLC. “Ngi na ka seng NPP lada ngi don 10 ngut ki khun, ngin wad haba da shem lada uwei ruh u jah, namar ka dei ka kamram ïa u kpa ba un wad, ngi ñiew kor lada don tang ar ngut ruh kampher”, u la ong.
Namar ba ka dei ruh ka sngi ka jingpynskhem ïa ki nongkitkam jong ka seng NPP Rambrai, na ka liang jong u Bah M.Byrsat MLA u la pynkhamti ruh ïa ka Syrnod jong ka jingpynkup bor kum u working president NPP ka Rambrai Jyrngam ïa u samla Bajop Pyngrope MDC ka Rambrai.
Ha katei ka sngi la don ruh shibun ki paidbah kiba na kiwei pat ki seng, kiba kynthup ïa kiba na ka seng Congress, HSPDP bad kiwei kiwei, kiba la wan ban pynïasoh lang sha ka seng NPP bad la ong ba ïa kitei kiba la wan ban pynïasoh, yn pdiang burom ha man la ki shnong namar ba ki lah bun than.
Ïa ka jingïalang la pynlong ha madan skul jong ka St. John Bosco Secondary School Rambrai bad la pynïaid ïa katei ka jingïalang da u samla World Champion Paliar President NPP Rambrai Jyrngam.
