Nongstoiñ, Jymmang, 20: U Bah Dominic Wahlang uwei na ki riew rangbah jong ka Langpih, haba ïakren bad u nongthoh khubor, u la ïathuh ba ki paitbah jong kitei ki hynriew phew khyndai tylli ki shnong ba kynthup ïa ki shnong Khasi bad Garo, kumba long haduh mynta ki ïoh mynsiem bad ki sngew shngaiñ haba ki shong ki sah ha kitei ki jaka, watla ka dang don hapdeng jong ka jingbym pat lah ban ïapynbeit.
U la ong ba ka daw ka dei ba na ka liang u Syiem ka hima Nongmynsaw, u la shimkhia bad register ïa ki jaka bad ki nongrim ïing jong kiba ki la shnong la sah.
U la ïathuh ruh ba na ka liang ki paralok Garo jong ki shnong bapher bapher, naduh kine ki snem kiba la dep ki la rai kut ba kin ym leit sha Assam da lei lei ruh hynrei kin sah beit ha Meghalaya. Hynrei, ka jingkylli ka long aïu u Conrad Sangma bad ka sorkar MDA kan leh halor kane ka ishu kaba sahteng lah slem.
U la ïathuh ruh ba ka daw kaba pynlong ïa ki paitbah Garo kiba shong ha kitei ki shnong khappud, ba kin rai kut ban sah ha Meghalaya, ka dei hadien ba ki la don ki briew jong ka sorkar Assam, kiba la wan pyntip sha ki, ba ka sorkar Assam kan ai tang lai bynta ka jaka ïa kawei kawei ka longïing, hynrei ki kper ki phrah bad ki jaka ba lait baroh ki dei ki jaka jong ka sorkar.
U la ong ruh ba dei halor katei ka nongrim ba ki paitbah Garo, ki la sdang ban sngewthuh shai bad shim ruh ka rai ban pyneh beit triang ba kin ym leit sha Assam da lei lei ruh. Lada ki ar sorkar kim sngap ïa ka jingkwah jong ki, ki jingeh kiba bun ki lah ban mih hadien habud.
Ki tyllong khubor kiba la ïoh lum na ki paitbah jong ki shnong kiba hap ha ka Langpih sector, ki ong ba baroh ki nongshong shnong hapoh katei ka sector, ki dawa ïa u Conrad Kongal Sangma Myntri rangbah ka jylla, ba kum u Myntri Rangbah um dei ban shu bret ïa ka report jong ka Regional Committee, hynrei u dei ban shim ka jingkitkhlieh ba ka jingpynbeit ïa u pud u sam ka dei ban long thik katkum ka jingkwah ki paitbah.
La ong ruh ba lada ka jingpynbeit ïa ka Langpih sector kam long katkum ka jingkwah jong ki paitbah nongshong shnong, u Myntri Rangbah bad ka sorkar jong u ki hap ban kit khlieh lada jia kino kino ki jingïaklumar lane ki huri hura, kiba lah ban poi haduh u pud jong ka jingthut ha ka shong suk shong saiñ bad ka jingshong syier jong ki paitbah nongshong shnong ha ka thaiñ baroh kawei.
