68 ngut ki pulit ophisar pyndep hikai na NEPA, kyntu ka DGP ban ai ka jingshakri hok sha ki paidbah

Nongpoh, Nohprah 22 : Kumba 68 ngut ki pulit ophisar ba kynthup 42 ngut ki Deputy Superintendent of Police (Probationers), 1 Cadet Inspector bad 25 ngut ki Cadet Sub Inspector/ Asst Sub Inspector mynta ka sngi da ka jingkmen kila shah pynkup burom haka Passing Out Parade jong ka 55th Batch Basic Course Trainees bala pynlong ha North Eastern Police Academy ha Umsaw shuwa ba kin leit ban shimti pat ïaka kam sha ki jylla la jong.
Napdeng kitei ki pulit ophisar bala pyndep jinghikai mynta ka sngi, 15 ngut ki dei naka jylla Meghalaya, 5 ngut na Manipur, 24 ngut na Nagaland, 10 ngut na Tripura bad 14 ngut na Sikkim ha kaba napdeng kitei ki 68 ngut kiba la pyndep jinghikai 21 ngut ki dei ki ophisar kynthei, bad kitei ki pulit ophisar kila ioh ruh ka jinghikai kaba janai shuwa ban kin shimti ïaka kam ban ai pat ka jingshakri sha ki paidbah.
Ïa kitei ki 68 ngut ki pulit ophisar la wan ban pynkup burom da ka Kong Idashisha Nongrang Director General of Police ka jylla Meghalaya, kum ka kongsan, ha kane ka sngi la sakhi ruh da ka jingdonlang u Bah Sanbor Shullai myntri ka tnad Arts and Culture, ka Kavita Jalan Director NEPA, ki heh pulit ophisar na ka jylla lem bad ki bahaiing hasem jong kitei ki pulit ophisar bala pyndep jinghikai.
Haba kren ha kane ka sngi naka liang ka kong Idashisha Nongrang kala ong ba kane ka dei ka jingsdang ka jingeh haka kam ba ki shakri sha ka imlang ka sahlang namar baroh kine kiba la pyndep jinghikai kin sa leit shala ki jong ki jylla ban shimti ïaka kam, hynrei kum ka khlieh duh ki heh pulit haka jylla kala kyntu ruh ïakitei ki pulit bala pyndep jinghikai ba kin ai ka jingshakri hok sha ki paidbah.