658 ngut ki nong Bangladesh kila ngat ha ki kyndon aiñ bad 194 ngut la pynphai noh: Prestone

Shillong, Rymphang 17: U Symbud Myntri Rangbah ka Jylla Meghalaya ba dei peit ïa ka tnad kam pohïing (Police) u Bah Prestone Tynsong u la ïathuh ha Ïingdorbar ha ka sngi Ba-ar ba ki don haduh 658 ngut ki nong Bangladesh kiba la lap bad pynngat ha ki kyndon aiñ ha ka Jylla naduh u snem 2021, ha kaba 194 ngut la pynphai noh hadien ba ki la pyndep ïa ka jingshah set phatok.
Haba jubab ïa ka call-attention notice ba la rah da u nongthaw aiñ ka VPP na Mawryngkneng u Bah Heaving Stone Kharpran, u Bah Tynsong u la ong ba ka sorkar ka la thaw ïa ka “jingpynkhreh kaba bniah bad bun bynta ne ka anti-infiltration” ban ïakhun pyrshah ïa ka jingwan buhai shnong beaiñ.
U la ong ba 18 tylli ki jaka talasi (anti-infiltration check posts), ki khyrdop bad kawei ka land custom station ki la treikam mynta ha ki jaka ba kongsan ha khappud Indo-Bangladesh.
“Ïa kine la pyndap da ki Anti-Infiltration Special Squad kiba treikam ha baroh ki distrik, kiba ju pynlong ïa ka jingpeitngor ban ïada na ka jingwan rung tuh, ki jingkhynra ba kynditkum ka NAKA bad ki jingpahara ha ki jaka ba lah ban shah ktah, ha ka jingïatreilang bad ka tnad Labour, ki Village Defence Parties ha ryngkat bad ki bor shnong,” ong u Tynsong ha ka ïing dorbar.
Ka sorkar ka la thaw ruh ïa ki 11 tylli ki District Task Force na ka bynta ban lap bad pynher krad ïa ki bar ri kiba wan rung beain.
“Kine ki lad jingïada kiba neh ki la wanrah ïa ki jinglap kiba kongsan bad ki jingmih na ka jingpyntrei kam,” u la ong.”Naduh u snem 2021 haduh ka 03.02.2026, la lap haduh 658 ngut ki nong Bangladesh ha ka Jylla bad la pynngat ïa ki ha ki kyndon aiñ ba ïadei.Ha kajuh ka por, 194 ngut ki nong Bangladesh la pynher krad hadien ba la ïoh ïa ka Travel Permit na Bangladesh Embassy.”
U bah Tynsong u la bynrap ruh ba la thaw ïa ka state-level committee jong ka jylla ban buddien ïa ka jingithuh bad beh ïa ki bar ri kiba sah palat pud.
Ka Meghalaya Resident Safety and Security Act, 2016, la pyntreikam ruh ha ki bynta jong ka East Khasi Hills, katba ki kyndon jong ka Immigration and Foreigners Act 2025, ka Bharatiya Nyaya Sanhita bad ki jingbthah jong ka Ministry of Home Affairs ki dang pyntreikam.
“Ka sorkar ka kyrpad ïa baroh ki seng bad ki nongshong shnong ban ïatreilang bad ki bor ba dei peit bad ailad ïa ka jingpynshisha ban pynlong lyngba ki lad kiba long katkum ka aiñ,” u la ong, da kaba ban jur ïa ka jingdonkam ban ïada ïa ki nongshong shnong ba shisha jong ka ri India katba dang pynthikna ba ïa ka jingwan rung be-aiñ la leh da kaba tyngeh hapoh ka aiñ.