Shillong, Jymmang: U MLA ka Mawlai u Bah PT Sawkmie hynne ka sngi u la wan ïashim bynta lang ha ka jingrakhe ïa ka ‘Diamond Jubilee’ ne ka jingdap 60 snem jong ka Savio Juniorate, ka shlem ai jinghikai ïa ki ba pule ban long Lyngdoh Sohblei (phadar), kaba don ha Mawlai ba la pynlong ha hall jong ka Savio Juniorate.
Ha kane ka jingrakhe la don bynta lang ruh u bah Embhahlang Syiemlieh, MLA bad MDC barim ka Mawlai kum u symbud kongsan, ki phadar, sister, ki khynnah na ki skul bapher bapher bad kiwei.
La sdang ïa ka jingrakhe ha kane ka sngi da ki sur tem bad rwai ba sngewtynnat na ki samla pule ka Savio Juniorate.Ki khynnah skul ha kane ka sngi ki la pyni ruh ïa ka jingïalehkai drama kaba la jer kyrteng ka, “The Witness” kaba la ak halor ka khana shaphang U Jisu Khrist u Nongpynim bad Nong siewspah.
Ha ba ai jingkren ha ka jingïalang kum u Kongsan, u Bah PT Sawkmie u la pynpaw ka jingkmen ban ïoh ïa don bynta lang bad kane ka jingrakhe jong kane ka skul kaba la rim bha ha ka thaiñ kaba la sei shibun ki Lyngdoh Sohblei.
Hadien ba la dep kren u Bah PT Sawkmie u la noh synñiang da ka song pisa sha ka Savio Juniorate na ka bynta ka jingdonkam jong ki haba pynlong ïa kane ka jingrakhe.
Ha kane ka sngi la ïoh ruh ïa ka jingkren na u Bah Embhah Syiemlieh, ha kaba ma u ruh kum uba la shah khot sngewbha u la pynpaw ïa ka jingkmen ban ïa don lang ha kane ka sngi.
