Shillong, Jylliew, 29: U National General Secretary ka AITC u Abhishek Banerjee ha ka sngi Balang u la ong ba ka party ka la buh thong ban pynieng kyrtong ha baroh 60 tylli ki Seat ha ka Elekshon sha ka Iingdorbar Thawaiñ ka ban sa long ha u snem 2023.
“Ka Trinamool Congress sa pyrshang katba lah ban pynkhlaiñ ha baroh kawei ka jylla Meghalaya. Ngin sa trei shitom khnang ba ngin dup lah ban pynieng kyrtong ha baroh 60 tylli ki Seat bad ngin pynthikna ruh ba baroh kin ïoh ïa ka jingjop,” ong u Abhishek haba ïakren bad ki lad pathai khubor.
Haba pynpaw ba ka AITC ka long kaba kloi ban ïatreilang bad kino kino ki party kiba ïahap jingmut, u la ong, “ka por ka dang kloi than ban ïathuh lypa hynrei kum ka kynhun kaba khlaiñ, ngi long kiba kloi ban ïatreilang bad kano kano ka seng saiñpyrthei kiba angnud ban ïasnohkti lang.”
Haba kylli, u Abhishek u la ong, “ngam dei u nongpeit khlur. Nga buh thong (ban ïoh) ha baroh 60 tylli ki Seat,” u la ong.
U la ong shuh shuh ba ka AITC ka ju ïakhun ïa ki elekshon halor ki nongrim.
“Ki nongrim jong ka party ki dei ki jingmyntoi ïa ki paidbah. Lada ka BJP ka dang khyrwait shabi na Delhi lyngba ka NPP ha Meghalaya, ngin hap ban pan jingkheiñ. Kata ka dei ka kam jong ka liang pyrshah kaba la jah baroh shikatta ha Meghalaya bad ngin sa pyni jaka ïa ki. Ki paidbah ka Meghalaya kin ym pyndem bad kim dei ban long ki nongshogn shnong Second Class ha la ka jong ka ri,” u la bynrap.
Une u nongïalam ka AITC u la ong ba ki paidbah ka jylla Meghalaya kiba angnud ban pynïasoh bad ka party bad kiba angnud ban ïohi ïa ki jingkylla ki dei ban bat lakam ha lade bad ban pynthikna ba ka dur rngai jong ka sorkar NPP ka dei ban shah pynrem ha ka elekshon ka ban sa long.
