Nongstoiñ, Naitung, 10: Ka jingtrei shitom jong ki nongrep biskot ka la shu sep ei ha ka jingbym poi pyrkhat, namar ka jinghiar dor kynsan jong u biskot. Dang ha ka taïew ba la dep ki nongthied biskot ki dang thied ha ka dor khatsan haduh arphew tyngka shi kilo, hynrei mynta ka sngi ka dor ka la hiar kynsan jlang kat haduh ba ki nongrep ki la shu ang lyngngoh, namar kam pat ju jia mynno mynno ruh ba ha u bnai Naitung kan long kumne.
Ha ki snem ba la dep baroh dei tad haduh ka taiew ba ar jong u bnai Nailar ba ka dor biskot ka la sdang hiar hynrei wat la katta ruh ki nongkhaï biskot ki dang thied ha ka dor khatsan haduh khathynriew tyngka shi kilo.
Ka kong A.Wahlang kawei na ki nongrep biskot haba pyntip ha u nongthoh khubor mynta sngi, ka la ong ba kam shym poi pyrkhat ba u biskot un hiar dor kynsan haduh katne bad ka jingtrei shitom jong ka naduh u bnai Rymphang kam sngew myntoi shuh.
Related Posts
Haba phai sha ka jingeh ym dei tang ki nongrep biskot kiba ïakynduh jingeh namar ka jingkylla jong ka ïew ka hat, hynrei naduh u snem ba la dep naduh ki nongrep sying, synsar, jhur bad kiwei kiwei ki la ud la nam bad khuslai namar ka jinghiar dor palat jong ki mar rep.
Haba ïakren bad ki nongrep na kylleng ki shnong hapoh ka district, ki la ong ba dei ha kine ki ar snem ba ka jingong jong ki nongthoh kot ba katba nang rep nang syrdep bad katba nang trei shitom katta nang pulom.
Nalor kata ki la ong ruh ba ka jing kyntu bad ka jingpynshlur jong ka sorkar ïa ki paitbah ba kin pynkhlaiñ ïa ka rep ka riang, kam don jingmut satia lada kam lah ban thaw lad ban pynbiang ïa ka dor ka mur, da kaba ai nuksa kum ïa u sying lada ka dor ïew dor hat kam biang mano ban bam, u briew ruh um lah ban bam lut, ki jingri ruh kim bam te shano keiñ kin bret.
Nalor kata kum ïa u synsar u mrad ruh ym long bam bad wat u khñiang ruh um bam. Lada dei ïa u biskot te la hap ban shu ai bam sniang namar haba la rep bun ban bam hi ruh ym lah pynlut.