Shillong, Rymphang 8 : Ki 6 ngut na ki 25 ngut ki nongbylla tih dewiong kiba iap ha ka jingbthei bom dynamite ha ka par dewïong ha Mynsngat Thangsko, East Jaintia Hills, Meghalaya ki dei ki nongshong shnong jong na Cachar District ka Jylla Assam.ïa kane la pynthikna da u Deputy Commissioner, u Aayush Garg.
Kane ka jingbthei bom dynamite ha par dewiong ka la jia haka 5 tarik Rymphang ha ka shnong Mynsngat Thangsko kaba hap ha Elaka Sutnga Saipung C&RD Block.
“Katkum ka jingtip ba la pynshisha, la ithuh ba 6 ngut ki briew kiba la khlad ki dei na Cachar district” ong u Deputy Commissioner.
Ki nongbylla tih dewiong kiba la khlad kiba dei na Cachar District ki kynthup ïa arngut shipara kata u Anwar Hussain bad u Dilwar Hussain na ka shnong Sarishakuri kiba la leit wad bylla sha Meghalaya.
Kiwei pat ki ki kynthup u Purunjay Vaishnav, u Nikunj Vaishnav, u Faruk Ahmed bad u Krishna Vaishnav.
Lah ban kdew hangne ba ki dang don sa 5 ngut ki nongbylla na Cachar District kiba la mynsaw kata u Saidur Rahman, Ramchandra Vaishnav, Niman Uddin, Krishnadhan Vaishnav bad u Bishnudhan Vaishnav kiba dang shah sumar ha Silchar Medical College and Hospital (SMCH).
Ki bor pyniaid jong ka Hospital ki la pynthikna ba 2 ngut napdeng kiba dang shah sumar ki dang don hapdeng ka jingshitom jur bha bad ki dang shah sumar ha intensive care unit.
Ka jingbthei bom ha krem dewiong ka la pynlong ïa ka jingshah kynthoh kaba jur bad naka liang ki kynhun ai jingïarap kata ka State Disaster Response Force (SDRF), Special Rescue Team (SRT) bad National Disaster Response Force (NDRF) ki dang bteng ban wad shuh shuh ïa kiba suba sahkut ha krem dewiong.
Ki heh ophisar ba kynthup ïa u Roktim Baruah, ACS, Additional District Commissioner-cum-CEO, DDMA ka Cachar District, bad kiwei ki ophisar na Katigorah bad Silchar kila peitngor bad ai ka jingïatreilang bad ki kynhun ai jingïarap.
“Ïa ka jinglong jingman la buddien bha ha ka kyrdan synshar ba ha khlieh duh, bad baroh ki jingdonkam, ki jingshakri ha ka liang ka koit ka khiah bad ki lad jingïatreilang la pyntreikam,” ong u DC da kaba bynrap ba ka bor synshar District Cachar ka dang ïai bteng ban pynïar ïa ka jingïarap ba pura ha ka liang ka synshar khadar bad ka jingïarap sha ki longïing kiba shah ktah.
U MLA ka Katigorah Constituency u Kamalakhya Dey Purkayastha u la leit ban jngoh ïa kitei ki longïing kiba la duh noh ïa la ki baha ïing bad u ai ka jingsngewlem na ka bynta u Myntri Rangbah ka Jylla, da kaba pynthikna ba ka Sorkar kan ai ka jingkyrshan.Ka jingtohkit ban tip ïa ka daw jong ka jingbthei ka krem dewiong ka dang ïaid shakhmat haduh mynta.
