Shillong, Nailar 12 : Ki briew kiba ïoh jingmyntoi na ki skhim Sorkar Pdeng kiba dei na Meghalaya kin ïoh ïashim bynta ha ka jingrakhe ïa ka lyngkhuh Sng Laitluid ka ri ka ban long ha Red Fort, Delhi ha ka 15 tarik u Nailar, 2023 .
Kumba 1,700 ngut ki briew na kylleng ka ri kiba ioh jingmyntoi na ki prokram ba kyrpang kum ka Jal Jeevan Mission (JJM), PM Kisan Samman Nidhi Yojna, Amrit Sarovar Yojna, Central Vista project bad kiwei kiwei ki dei kiba la khot sngewbha ban sngap ïa ka jingai jingkren u Myntri Rangbah Duh, u Narendra Modi ïa ka ri na kane ka jaka ba kyrpang.
ïa kane ka sienjam ban khot sngewbha ïa ki briew kiba trei ha ki kam bapher bapher na kylleng ka India la shim da ka Sorkar Pdeng ha ka jingbud ïa ka jingngeit ha ka ‘Jan Bhagidari’. Lai ngut ki briew kiba ïoh jingmyntoi na ka JJM ha Meghalaya ki dei kiba la shah khot sngewbha ban ïashim bynta ha ka jingrakhe ïa ka lyngkhuh sngi ioh jinglaitluid ha New Delhi. Ka JJM ka la wanrah ïa ka jingkylla kaba bha ha ka jingim jong ki briew ha Meghalaya. Ka Kong Gloria Umsong na Makwkynrew, East Khasi Hills, u Bah Jenesiuis Marwein, Makwkynrew, East Khasi Hills bad ka Samla Babiangmon Lapang na Mawphrew Ri Bhoi District na Meghalaya kin ïashim bynta ha kane ka jingrakhe ha katei ka sngi.
Ka Kong Gloria Umsong ka la ong ba kane ka dei kaba sngewtynnad bha ban shah khot sngewbha ha kaba kan ïoh ban ïohi ïa ka jingrakhe ïa ka lyngkhuh sngi ïoh jinglaitluid ha Delhi. Ka la ong ba ka JJM ka dei ka sienjam kaba phylla jong ka sorkar, da kaba bynrap, “Ka JJM ka la pynkylla ïa ka jingim, khamtam jong ki khynnah kynthei bad ki longkmie ha ka shnong jong ngi. Ka shnong jong ngi ka la ïoh um kor ha u snem 2020. Mynshuwa ngi ju pynlut por ha ka jingrah um na ki pung bad ki wah. Mynta ka jingim ka la kham suk namar ka um ka poi ha ïing lyngba ki kor jong ka JJM.”
U Bah Jenesiuis Marwein uba ïoh jingmyntoi na ka JJM u la ong ba u sngewnguh bha ïa ka Sorkar kaba la khot sngewbha ïa u ban ïashim bynta ha ka jingrakhe ïa ka lyngkhuh sngi ïoh jinglaitluid ha Delhi. U la ong ba u la ïoh ïa ka um kor ha u snem 2020 bad naduh katei ka por, um shym la hap ban pynshitom ïalade ban leit rah um dih na wah. U la ai jingsngewnguh ïa u Myntri Rangbah Duh uba la pyrkhat ban pynbiang um kor bad ban pynthikna ba ka um kaba khuid ka poi sha man ki longïing.
Ka Samla Babiangmon Lapang na Mawphrew, Ri Bhoi District kaba trei ha ki kam rep, ha ka jingïakren bad ka PIB Shillong ka la ong ba ka sngew shongshit ba ka la shah khot sha New Delhi ban ïohi da la ki jong ki khmat ïa ka jingrakhe ïa ka lyngkhuh sngi ïoh jinglaitluid. Ka la kren shaphang ki por shuwa ka JJM bad ka la ong ba kane ka skhim ka la pynkut ïa ki jingeh ha kaba ïadei ba ka jingtong um na kawei ka tyllong. “Mynshuwa ngi ju ïashoh ruh ha ka por rah um. Hynrei hadien u snem 2020 haba ka um ka la poi sha ki ïing jong ngi, baroh ki jingeh kiba ïadei bad ka jingïoh ïa ka um kaba khuid ki la kut,” ka la ong da kaba batai shaphang ki jingshem lajong halor ka jingjop jong kane ka skhim.
Kumjuh, kito kiba ïoh jingmyntoi na ka Amrit Sarovar kum ka Kong Merisuklin Syngkon na East Jaintia Hills, u Meduwin Marak bad ka Delpinna Sangma na East Garo Hills ki dei kiba la shah khot sngewbha ban ïashim bynta ha ka lyngkhuh sngi ïoh jinglaitluid ha New Delhi.
U Meduwin Marak na ka shnong Rongjeng ha East Garo hills u la ong ba u sngew sarong ban shah khot sngewbha kumne sha New Delhi bad ba u khmih lynti ban sngap ïa u Myntri Rangbah Duh ha ka jingai jingkren jong u na Red Fort. U la ong ruh ba ka Amrit Sarovar ka la plie lad kamai jakpoh ïa u bad u hun bha ïa kane. U Meduwin Marak bad ka Delpinna Sangma ki dei ki nongri dohkha na East Garo hills.
Ha kane ka jingleit jong ki, kine ki briew kiba la shah khot sngewbha sha New Delhi kin ïoh lad ban leit peit ïa ka National War Memorial bad ka Pradhan Mantri Sangrahalya (Ka Museum u Myntri Rangbah Duh) ha New Delhi.
