5th Rally of Himalayas: Thaw histori ka Phoebe Dale Nongrum kum ka kynthei ba nyngkong ban jop ha ka T1 Xtreme

SHILLONG, Risaw 13: Ka Phoebe Dale Nongrum ka la thaw histori na ka bynta ka Meghalaya bad kumjuh ruh ïa ka thaiñ shatei lam mihngi, kum ka kynthei kaba nyngkong ban ïoh kyrdan jingjop ha ka lympung ïakop 5th Rally of Himalayas hadien ba ma ka ryngkat bad u Venu, ki la lah ban pyndep ha ka kyrdan ba lai (2nd Runners-Up) ha ka jingïakop T1 Xtreme Category.
Da kane ka jingjop ka Phoebe ka la kylla long ka kynthei kaba nyngkong eh ban ïoh ïa ka kyrdan jingjop ha kane ka lympung ïakop motorsport.
ïa ki kyrdan jingjop ha ka T1 Xtreme Category la khur da u Araya Rana kum u lahduh, bud sa u Lakhpa na Arunachal Pradesh ha ka kyrdan ba ar (1st Runners-Up), nangta ka Phoebe Dale Nongrum na Meghalaya ha ka kyrdan ba lai (2nd Runners-Up).
Kaba pyndap shuh ïa ka jingsarong ka long ba ka kynhun jong ka Phoebe bad u Venu ki la ïoh khur ruh ïa ka khusnam “Best Team”, kaba kdew ïa ka jingtbit, ka jingtreilang, bad ka jingshah shitom jong ki ha baroh kawei ka lympung ba kane ka Rally ka dawa.
Ka Rally of Himalayas, kadei ka jingïalehkai motorsport kaba pawnam bha kaba la pynlong da ka Himalayan Xtreme Motorsports bad la mynjur da ka Federation of Motor Sports Clubs of India (FMSCI).
Ka sienjam jong u snem 2025 ka kynthup ïa ka jingïakop ñiah kali ha ki katto katne ki jaka lum kiba eh tam ha ki lum Himalaya jong ka ri India — kaba sdang naduh Manali bad ïaid lyngba ïa ka Gramphu, Bathal, Jispa, Darcha, bad ka Shinku La Pass, kaba pynjlan sha ki thaiñ kiba itynnat jong ka Ladakh bad Zanskar.
Ka jingjop jong ka Phoebe ka dei ka por kaba kongsan ym tang na ka bynta ka jylla jong ka hynrei na ka bynta ki kynthei ha ka jingïalehkai motorsports jong ka ri India. Ka jingjop jong ka ha ka jingïalehkai kaba la ju synshar da ki shynrang ka ïeng kum ka khubor kaba khlaiñ ban pynpaw ïa ka jingminot.