58,625 ngut ki khynnah skul ban ïakhun ïa ka eksamin SSLC mynta ka sngi
28, 174 ngut ha ka eksamin HSSLC
Shillong, Lber, 23: Ka eksamin Secondary School Leaving Certificate (SSLC) ba ju tip paidbah kum ka eksamin Matric ba la pynlong da ka Meghalaya Board of School Education (MBoSE) mynta u snem 2022 kan sdang naduh ka 24 tarik mynta u mynta. Ki don haduh 58,625 ngut ki khynnah skul ha ka jylla Meghalaya baroh kawei ki ban sa ïakhun ïa kane ka eksamin.
Katba ki khynnah skul ki ban ïakhun ha ka eksamin Higher Secondary School Leaving Certificate (HSSLC) 2022 ba kynthup ha ka Arts Stream, Science Stream, Commerce Stream bad Vocational ki don baroh 28, 174 ngut.
Katkum ka jingkheiñ ba la ai da u Deputy Director jong ka Meghalaya Board of School Education (MBoSE), Shillong, na ki 58,625 ngut ki khynnah ban ïakhun ïa ka eksamin SSLC, 25,347 ngut ki dei ki khynnnah shynrang bad 33,278 ngut ki khynnah kynthei. Na kine, 25,486 ngut ki dei kiba ïakhun kum ki Regular-1 bad 15,061 ngut ki dei kiba ïakhun kum ki Regular-II, 385 ngut kum ki Private Candidate, 11,337 ngut kum ki Non-Regular, 9 ngut kiba ïakhun ïa ka Improvement bad 6347 ngut kum ki Comparmetal.
Ki jaka thoh eksamin ha Shillong Region ki don 87 tylli, katba ha Tura Region ki don 65 tylli.
Ki skul ba la ithuh da ka MBoSE ha Shillong bad Tura Region ki don baroh 646 tylli, katba ki skul ki bym pat ithuh da ka MBoSE ha Shillong bad Tura Region ki don 1166 tylli. Baroh ki long 1812 tylli.
Ha ka ekamin HSSLC, ha ka Arts Stream ki khynnah skul ki don 23,064 ngut, kata, 10,128 ngut ki shynrang bad 12,936 ngut ki kynthei. Ha ka Science Stream ki don 3033 ngut, ha kaba 1301 ngut ki dei ki shynrang bad 1732 ngut ki dei ki kynthei. Ha ka Commerce Stream ki don 2069 ngut, ha kaba 1153 ngut ki dei ki shynrang bad 916 ngutki dei ki kynthei. Ha ka Vocational Stream ki don tang 8 ngut, kata, saw ngut ki shynrang bad saw ngut ki kynthei.
Ki jaka thoh eksamin ha nongbah Shillong Region ki don 66 tylli katba ha Tura Region ki don 39 tylli, baroh ki jaka thoh eksamin ki long 105 tylli.
Ki skul ba la ithuh da ka MBoSE ha Shillong bad Tura Region ki don baroh 260 tylli, kata, 180 ha Shillong Region bad 80 tylli ha Tura Region. Ki skul bym pat ïoh jingithuh da ka MBoSE ki long 124 tylli, kata ha Shillong ki don 83 tylli bad 41 ha Tura. Baroh ki don 384 tylli.