58 tylli ki ïing, ki skul, ki Aganwadi ha Jashiar ki la ïoh umbam na ka skhim JJM

Mawkyrwat, Naiwieng 21: Ban pynthikna ba baroh ki shnong ha ka South West Khasi Hills District kiba pyntrei ïa ka skhim umbam umdih na ka Jal Jeevan Mission (JJM) kin ïoh ïa ka umbam umdih kaba paka ha ka sngi Thohdieng u Executive Engineer ka PHE Mawkyrwat Division u la hiar jurip sa ïa ka jingpyntrei ïa kane ka skhim ha shnong Jashiar hadien ba ka tnat PHE ka la dep aiti ha ka VWSC ha u snem 2023 ha kaba ka la pyntrei ha ka jinglut kaba T. 43 lak.
Ha kane ka jingjurip u Bah K. Nongbsaw uba dei u Executive Engineer PHE Mawkyrwat Division, South West Khasi Hills District, ryngkat u Bah Steven Wahlang, District Project Manager, Jal Jeevan Mission (JJM), South West Khasi Hills District la lap ba ka jingpyntrei ïa ka skhim JJM ha ka shnong Jashiar ka la long kaba jop ha kaba baroh 58 tylli ki longïing, ki skul bad ki Aganwadi Centre ki la ïoh ïa ka umbam umdih kaba paka kumba la bhah.
Ym tang kata, ka shnong Jashiar ka la ïoh ruh ïa ka jingithuh kum ka ‘Har Ghar Jal Village’ kaba baroh ki longïing longsem, ki jaka ai jinghikai, ki jaka sumar ki la ïoh ïa ka umbam umdih lyngba kane ka skhim JJM.
Namarkata, halor kine ïa kaba na ka liang ka tnad treikam jong ka PHE Mawkyrwat Division ka la dep ban pyntrei ïa kane ka skhim umbam umdih kumba la bhah, ki nongïalam shnong bad ki paidbah ki la pynpaw ka jingkhublei kyrpang ïa u Narendra Modi, u Myntri Rangbah duh jong ka Ri India uba la pynïoh ïa kane ka skhim. Ha kajuh ka por ki la ai khublei ruh ïa ka ophis u Executive Engineer, PHE Mawkyrwat Division kaba la pynbit pynbiang ïa ki jingdonkam baroh ha kaba ïadei bad ka jingpyntrei ïa kane ka skhim.