Shillong, Naitung 27 : Ka National Health Mission (NHM) hangne ha Meghalaya ka la pynlut haduh 550 klur tyngka ha ka jingïakhun ïa kane ka khlam COVID-19 kata tang ha ki ar snem ha u 2020 bad 2021. Ki tyllong khubor na ka tnad ka koit ka khiah ki bym kwah ban pynpaw kyrteng ki la ïathuh ba ïa kane ka pisa la pynlut ha ka kyrteng jongka khlam COVID bad kaba bun na kane ka pisa ka dei kaba wan na ka sorkar pdeng.
Ha ka dorbar mang tyngka kaba la long ha u Lber mynta u snem, ka sorkar MDA ka la ïathuh ba ka la pynlut 650 klur tyngka ha ka jingïakhun pyrshah ïa ka khlam COVID-19 kata ha u snem 2020-21 bad 2021-22. Kane ka long kat kum ka jingjubab u myntri ka tnad ka koit ka khiah ïa ka jingkylli kaba la wanrah da u bah P.T Sawkmie. Ha katei ka jingjubab u la ïathuh ba ka NHM ka la pynlut tang 85 klur tyngka.
Hynrei mynta ka tyllong khubor ka ïathuh ba ka NHM kab la khlieh da u Mission Director ym tang ba ka pynlut 550 klur tyngka hynrei ka la shim ruh wat ïa ka pisa ba la lum da ka sorkar na kito kiba test RAT, RT-PCR kiba la leh ha ki screening centres kiba la shna ha kiba bun ki jaka ha ka jylla ha kato ka por ba dang jur bha ka khlam COVID.
Kine ki heh ka tnad ka koit ka khiah ki la buh da u dak jingkylli uba khraw mano ba la aibor ïa ka NHM ban shim ïa kane ka pisa ba la lum kaba dei ban leit ha ka jingshisha sha ka pla tyngka jongka sorkar jylla.
Kitei ki heh ki la ong “ Ngi la lyngngoh hi ngaiñ kumno ka NHM ka pynlut haduh 550 klur tyngka namar ka mission jongka ka long ban pyntreikam hok ïa ki skhim bad prokram ka sorkar pdeng. Kumta ka jingkylli ka long mano ba aibor ïa u Mission Director ka NHM ban pynlut ïa kane ka pisa.
Ki la pynpaw ba kaba bun ka pisa ba la pynlut da ka NHM ka long ha kaba leit sam ïa ki mar bam sha kito ki briew kiba shong set slung (Quarantine) ha ki Corona Care Centre bapher bapher ha ka jylla bad ki jaka sah ïa ki nongtrei ka koit ka khiah. Hynrei kaba pynlyngngoh pat ka long ba ïa kiba bun ki bill jong ki briew kiba dei ban ïoh kiba pynbiang bam, kali, jaka sah ïa ki nongtrei ka koit ka khiah ym pat dep siew lut haduh mynta” ong ki heh sorkar.
Kumta halor kane ki la sngewdei ba ka sorkar kan thung da ka jingtohkit khnang ban lap kumno ka NHM ka pynlut ïa katei ka pisa.
