55 tylli ki dei ki bus elektrik, napdeng 84 tylli kiba la pyllait paidbah u Myntri Rangbah

Shillong, Rymphang 27: U Myntri Rangbah ka Jylla Conrad K. Sangma mynta ka sngi u la kaweh lama ban pyllait paidbah ïa 84 tylli ki bus ba kynthup ïa 55 tylli ki bus electric kiba la pynrung hapoh ka PM eBus Sewa Scheme, ha ka prokram kaba la pynlong ha ka ïing dorbar thawain ka jylla ba thymmai jong ka Meghalaya.
Kane ka jingpynlait paidbah ïa kine ki bus, ka long kum ka jingpynithuh kyrteng kaba pura ïa ka “Ka Bos Jong Ngi” kaba hap hapoh ka tnad pynroi sor ne Urban Affairs Department.
Ki bus ba la pynrung thymmai ki don ïa ki air-conditioning, ki jaka charge mobile, ki kor ba la tip kum ka real-time tracking systems, ka e-ticketing ban pynthikna ïa ka jingsuk, jingshngaiñ, bad ka jingtrei kam bha na ka bynta ki nongleit nongwan.
La sdang mynta ka sngi ïa ka pilot run ha ka lynti iaid jong ka IIM Shillong-Upper Shillong, ha kaba la buh ban iaid man ka sngi naduh ka por 7:00 baje mynstep haduh ka por 9:00 baje mynstep.
La khmih lynti ba kane ka jingthmu kan pynbha ïa ka jingiadei bad ki sor bad ban ai ïa ki nongshong shnong ïa ka rukom leit jingleit kaba lah ban shaniah, kaba suk, bad kaba ïadei bad ka mariang.
Ha kane ka prokram la kynthup ruh ïa ka jingaiti ïa ki hynriew tylli ki kali food carts sha ki nongïoh jingmyntoi na ka Van Dhan Vikas Kendra (VDVK).U Myntri Rangbah ka Jylla u la aiti ïa ki kali kit marbam sha ki nongioh jingmyntoi, kaba kyrshan ïa ki jingthmu ban kyrshan ïa ka ioh ka kot bad ka jingseng kam seng jam ha ki jaka ba shapoh ne ka grassroots entrepreneurship.
Ka jingpyllait paidbah ka long ka dak kaba kongsan ha ka jingpyrshang jong ka Sorkar kaba dang ïaid sha khmat ban pynthymmai ïa ki lad leit jingleit paidbah, ban thaw ïa ki lad kamai, bad ban kyntiew ïa ka jingroi sor kaba neh.