55 klur pynlut ka Sorkar MDA ban pynbhabriew ïa ka Sor Tura bad ban shna ïa ki surok

Tura, Nailur, 02: U Myntri Rangbah ka Jylla u Conrad K Sangma, ha ka sngi Thohdieng u la plie paidbah ïa ka commercial facility-cum-Parking Lot jong ka tnat Pynroi Sor ha A.konggre, Tura.
Ha kane ka sngi, la sakhi lang da u Chief Advisor jong u Myntri Rangbah u Thomas A Sangma, u Deputy Commissioner ka West Garo Hills u Swapnil Tembe, u Superintendent of Police u VS Rathore, u CEO jong ka Tura Municipal Board, ki ophisar jong ki tnat treikam bapher bapher, ki nongïalam shong bad ki riewpawkhmat.
Haba kren ha kane ka jingïalang kum u Kongsan u Myntri Rangbah u la ong ba ka Tura kum ka Headquarter jong ka rilum Garo ka la shah ieh beiñ la slem ha kaba ïadei bad ki jingtei. Kane ka Sorkar, ka la buh hakhmat ïa ka thong ban kyntiew ïa ka sor Tura hadien ba la ïohbat ïa u la kam synshar.
Katkum ka jingong jong u Myntri Rangbah, lyngba ka Smart Town Project, ka Sorkar ka la pynlut pisa T. 55 crores na ka bynta ban pynbhabriew ïa ka Sor Tura bad ban shna pynbna ïa ki surok shnong ha ki dong bapher bapher bad ïathuh ruh ba ka Sorkar ka la mang pisa T. 15 klur na ka bynta ban shna ïa ki surok thymmai bad T. 13 klur ban pynlut ha kaba shna pynbna ïa ki surok kiba la jot.
U Myntri Rangbah u la pyntip ba ka Sorkar ka la buh ruh hakhmat ïa ka thong ban weng ïa ka jingkyrduh um ha Tura bad haduh 70 persen ïa kane ka jingeh la lah ban weng khnang ban pynkut noh ïa ka jingkyrduh um.
Haba pynpaw ba ka sor Tura ka la nang roi ha ka jingbun briew, u Myntri Rangbah u la ong ha ba ha ka wat kaba ar ban pynbhabriew ïa ka Sor Tura, ïa ka surok ha Tura Bazar yn sa shna noh mardor bad ka Sorkar kan sa pynlut pisa kumba T.5 klur tam bad ong ruh ba ïa ki dong bapher bapher yn sa pynieng da ki Solar Street Lights.
Ban tem ïa ka jingkiewdor jong ki marbam mardih na ka daw ka jingdon jong ki riewshim kabu, u Myntri Rangbah u la ong kyntu ïa ki nongkhaii ba kin ïatreilang bad ki Pulit bad ki bor synshar District bad ha kajuh ka por u la kular ban ai jingïada ïa ki nongkhaii bad ki nongshong dukan lada donkam.
Da kaba pynpaw ba u don ka jingangnud ban pynlong ka Sor Tura kawei na ki sor ba pawnam ha ka thaiñ Shatei Lammihngi u Myntri Rangbah u la banjur ba dei ban don ïa ka Solid Waste Management kaba biang ban pynbhabriew ïa ka Sor.
U Thomas A Sangma haba kren hashwa kane u la ong ba ka jingpynroi ïa ka Sor Tura ka la ïaid shakhmat lyngba ka jingtrei shitom jong ka Sorkar bad ki paidbah kiba la ai ïa ka kti ka mon ka kti ka diang ban pynurlong ïa ka jingangnud jong ka Sorkar.
U Deputy Commissioner u Swapnil Tembe ula ong ba ka iew Tura ka dei kaba khapngiah hynrei da ka jingplie paidbah ïa ka Commercial Complex ba thymmai la lah ban pynkynriah ïa ki nongdie madan sha kane ka complex. U la kyntu ruh ïa ki nongdie madan ba ki dei ban ïatreilang bad ban bud ryntih ïa ki jingbthah jong ka Tura Municipal Board (TMB).