Shillong, Lber, 30: Ka National Health Mission, Meghalaya ha ka sngi Balang ka la pyntip ba ka la pyllait ïa ka song pisa kaba T.53 klur na ka bynta ban pyntreikam ïa ka Meghalaya ASHA Benefit Scheme (MABS) bad ïa ka Meghalaya Maternity Benefit Scheme (MMBS) sha ki nongtrei Asha kiba ju ai ka jingshakri hapoh ka tnat ka Koit ka Khiah ha kane ka jylla Meghalaya.
U Mission Director jong ka National Health Mission, Meghalaya haba pyntip halor kane u la ïathuh ba ka jingpyntreikam jong ka Sorkar Meghalaya ïa ka Meghalaya ASHA Benefit Scheme ka long ban pynjanai ïa ka jingai jingshakri ki Asha hapoh ka imlang ka sahlang.
Ka pisa kaba la mang bad ba la pyllait da ka Sorkar Meghalaya ka la sdang naduh u snem 2012-2013, kata, T. 7,80,25,750 klur. Ha u snem 2013-14 ym shym la mang pisa. Ha u snem 2014-15 la pyllait pisa T. 10,00,00,000 klur. Naduh u snem 2015 haduh u snem 2019 ka Sorkar kam shym la mang pisa eiei shuh ban jingïarap sha ki Asha lyngba kane ka skhim.
Dei ha u snem 2019-20 ka Sorkar Jylla ka la pyntreikam biang ban mang pisa T. 25,36,91,500 klur. Ha u snem 2020-21 la mang pisa sa T. 2,50,00,000 klur bad na ka bynta u snem 2021-22 ka Sorkar ka la mang pisa sa T. 53,00,00,000 klur.
Na ka daw ka jingbym pyllait ïa ka pisa haduh ka Financial Year 2018-2019, ka National Health Mission, Meghalaya kam shym la lah satia ban siew tista ïa kane ka jingïarap sha ki Asha.
Ha u bnai Jylliew, 2021, ka Sorkar Jylla bad ki nongïalam jong ka Meghalaya ASHA Workers Union (MAWU) ki la pynlong ïa ka jingïasyllok ban ïathir ïatai sani halor ka jingbym siew tista jong ka Sorkar ïa kane ka jingïarap.
Ha kane ka jingïakren, la shim ïa ka rai ba ïa ka Meghalaya ASHA Benefit Scheme (MABS) yn bujli noh da kaba siew beit T. 2000 shi bnai na kawei kawei ka Asha ka ban treikam naduh u bnai Ïaiong, 2021.
La rai ruh ba ïa ka Meghalaya Maternity Benefit Scheme (MMBS) yn pynkut noh naduh u bnai Ïaiong, 2021 namarba ka la don pat sa kawei ka skhim jingïarap kaba ïasyriem kumjuh ba la ai na ka Sorkar Pdeng ïa kaba la tip kum ka Pradhan Mantri Matru Vandana Yojana (PMMVY) ïa kaba la pyntreikam naduh u bnai Kyllalyngkot, 2017. La rai ruh ba kine ki ar tylli ki skhim ba la pyntreikam da ka Sorkar Jylla yn siew sha ki nongtrei Asha haduh u nai Lber, 2021.
Namarkata, ka Sorkar ka la pyllait ïa ka pisa kaba T. 53 klur ha kane ka Financial Year 2021-22 na ka bynta ban siew sha ki nongtrei Asha kiba dei ban ïoh ïa kine ki skhim, kaba long ruh ka jingpyllait pisa kaba heh ba la pyllait da ka Sorkar naduh ba la pynsdang ïa ka NHM bad ban pyntreikam ïa ka MABS bad ïa ka MMBS bad ban pynkhuid ïa kino kino ki jingsiew haduh u nai Lber, 2021.
Ka Sorkar Meghalaya ka la pyllait ïa ka pisa ba la mang hapoh ka Meghalaya ASHA Benefit Scheme (MABS) ba siew ïa baroh ki jingsiew haduh u Lber, 2021.
Ïa ka shithi ba la mang pisa la aiti sha ki Deputy Commissioners jong ki District ha kaba la pyllait ïa ka pisa ha ka 29 tarik, Lber, 2022 ha kaba la phah kopi ruh sha ki District Medical and Health Officers kum ka jingpyntip.
Da ka jingkyrshan jong ka National Health Mission, ka Sorkar Meghalaya ka la pyntreikam ïa ka jingsiew sha ki ASHA bad ASHA Facilitator. Ka jingthung haba shna ïa ka Mobile Application ka long ban pynsuk ïa ka rukom siew pisa sha ki Asha bad ban pynthikna ba ka jingpyllait pisa kan long ha kajuh ka por.
Kane ka Application kan long ruh ka atiar kaba kongsan na ka bynta ki Programme Officers ha kino kino ki liang bad ba kin dup lah ban tip la ki Asha ki ïoh pdiang neem ïa ki jingsiew khnang ba kan ym don kano kano ka jingthud haba siew ïa ka pisa.
Ïa kane ka Application la pynsdang ha Umling Block jong ka Ri-Bhoi District lyngba ka Pilot Basis. Ki Asha kiba la pynrung kyrteng hapoh kane ka Application ki long 471 ngut tang na Ri-Bhoi District. Ka jingsiew pisa ka la kot haduh T. 29.90 lak. Kane ka rukom siew ïa ka pisa kan pynduna na ka 120-150 sngi sha ka 5 sngi ba ki Asha kin ïoh ïa kane ka pisa.
