500 ngut ki khynnah kiba im bad u HIV, palat 10 hajar ngut kiba ïabit HIV/AIDs ha Meghalaya

Shillong, Naiwieng 28: Ka Meghalaya ka la kynjoh ïa palat 10,000 tylli ki case jong ki briew kiba don ïa ka jing pang HIV/AIDS ba kynthup ïa 500 ngut ki khynnah, pyntip ka Dr K L Iawbor, Project Director ka Meghalaya AIDS Control Society (MACS). Haba kren bad ki lad pathai khubor la ong, “Palat 10,000 ngut ki briew la test positive ïa ka HIV/AIDS ha Meghalata, bad ka ima ba 500 ngut na ki, ki dei ki khynnah.” Ka East Jaiñtia Hills ka dei kaba bun eh ki nongpang HIV/AIDS, ha kaba bun na ki khynnah ba ngat ki dei kiba wan na ki longïing kiba duk.
“Ka daw ba hakhmat eh halor ka jingsaphriang ka jingpang ka dei namar ka jingïashongkha khlem ki jingïada bad bun ki briew kim shym la wan shakhmat ban leh test,” ong ka Dr Iawbor.
Haba pynbna ba ka Jylla ka la pynkhreh bha ban rakhe ïa ka World AIDS Day ha ka 1 tarik Nohprah, ka Dr Iawbor ka la ban jur ïa ka jingdonkam ban ïashimlang ïa ki jingkitkhlieh ha ka ban tehlakam ïa ka jingsaphriang jong kane ka jingpang.
“Une u khniang u dei uba ma bha bad ka dei ka kamram jong iwei pa iwei na ngi ban pynsangeh ïa ka jingïabit khnang ba ngin lah ban pynlong ïa ka Jylla bad ka Ri jong ngi kaba lait na ka HIV hapoh u 2023” ka la bynrap.
Ka MACS ka la pynlong ïa ki rynsan ïalap bad ki prokram ban leh test, ha kaba ka la screen ïa 6882 ngut ki briew bad shem ba 24 ngut ki dei ki HIV positive. “Haduh 87% na ki case la shem na ki outreach program ba la pynlong sha ki jaka ba idon jingma bha bad ki riew paidbah,” ong ka Dr Iawbor haba bynrap, “Don na ki, kiba la wan hi dalade bad don pat kiba phah da kiwei halor ka jingsuba ba ki lah ban don ïa une u khniang jingpang”.
Ka MACS ka la pynkhreh ban pynlong ïa ka bike rally bad kiwei kiwei ki prokram ha ka 1 tarik Nohprah ha kaba u Myntri Rangbah ka Jylla Conrad K Sangma un long u kongsan, ban pynphriang ïa ki jingtip bad jingkyrshan ïa kito ki briew kiba im bad u khniang HIV/AIDS.
Ki Myntri Sorkar bad baroh ki MLA ka East Khasi Hills nalor ki skul hikai jong ki nos bad kiwei kiwei lem bad ki briew kiba don ïa ka jingpang HIV kin ïadonlang ha kane ka prokram.