50 snem ki la ïaid naduh ba ki ar tylli ki longïing ki la shong la sah ha Nongkhrong

Tesar Marweiñ

Nongstoiñ, Lber 25: Ka long kaei kaei ka ba ki paitbah kim lah ban ngeit, hynrei ka long pat ka jingshisha ba ka don kawei ka jaka ha ki thaiñ Rambrai kaba don shaphang mihngi na ka shnong Mawthungmarwei bad Mawkohïew kaba la tip kum ka Nongkhrong.

Hadien ba la ïoh ban pule ïa ka history jong ka jingim jong u (L) Domdoi Khardewsaw u ba dei u Khristan ba nyngkong eh ha ka thaiñ Umyiap, kaba la thoh da u (L) bah Sholandar Syiem, la lap ha ba katei ka history ka ïathuh ba u Domdoi Khardewsaw u la ïap ha ka shnong Nongkhrong hapoh Ïingmane hadien ba u la pynkut ïa ka jingïathuhkhana.

Ha ka jingpyrshang ban wad jingtip bniah bha ïa ka jinglong jingman jong katei ka shnong Nongkhrong, ym shym don shuh ki riew tymmen kiba dang lah ban kynmaw katno phew tylli ki long ïing ki don ha kata ka por bad ha ka jingpyrshang ban wad jingtip bniah kaba la shim por bun bun snem, la ïoh ban ïakynduh ïa uwei u riew tymmen u ba kyrteng u parad Kretshon Mawtyllup, u ba shong ba sah ha ka shnong Mawthungmarwei.

Katkum ka jingïathuh jong u, u la ong ba ka karta jong u ka la palat ïa ka khyndaiphew snem bad haba pyrshang ban kylli bniah shaphang ka shnong Nongkhrong, u la ong ba ki kmie ki kpa ki ïathuh ba la kha ïa u ha ka shnong Nongkhrong bad ha ka por ba u dang khunlung, ka ïing ka sem jong u ka la phet shnong noh sha Phodumbah bad haba u la samla bha u la poi shong kha noh ha ka shnong Mawthugmarwei kaba u shong u sah haduh mynta.

Ban lap ïa ki jingshisha shaphang katei ka shnong Nongkhrong, u nongthoh khubor u la leit haduh katei ka jaka bad la lap ruh ba ki dak ki shin jong ki nongrim ïing, ki kharai kper, u lum jingtep ki dang sah haduh mynta. Nalor kata la lap ruh ba ki don ar tylli ki ïing bad haba la pyrshang ban leit peit ha kawei na ki ïing la lap ba ym don briew, namar ki don saw ngut ki long kmie kiba thung riewhadem ha ka kper kaba heh bha bad la ïoh ban ïakren bad ki.

Haba pyrshang ban kylli la ki naduh mynno ki la sdang ban wan shong shnong ha katei ka jaka kitei ki longkmie ki la ong ba la palat sanphew snem ki la shong la sah ha katei ka jaka. Haba kylli pat la ki don ne em u rangbah shnong uba peit ïa ki ki la ong ba ïa ki kam shnong kam thaw ki hap ha ka jingpeit jong u sordar jon ka shnong Mawmluh.

Haba kylli pyrthew pat shaphang ka history jong katei ka shnong ha ki por mynhyndai, ki la ong ba kim tip ei ei hynrei ki tymmen ki shu ïathuh ba ka jingphet shnong jong ki briew na katei ka jaka ka dei na ka jingwan ka jingpang khlam bad ki la ong ruh ba katkum ka jingïathuh ki tymmen mynshuwa ka jingïap jong ki briew ka jur bha khamtam eh ki khunlung. Ki la ong ruh ba na ka jingwan katei ka khlam ki briew ki phet shnong noh sha Phodumbah, Mamluh, Mawthungmarwei bad sha Rambrai.