Shillong, Nailar 30: U Myntri Rangbah ka Jylla Conrad K Sangma ha ka sngi Thohdieng, ula plie paidbah ïa ka Civil Service Coaching & Training Centre jong ka A’chik Welfare Society (AWS), hapoh ka AB Krima No.IV, ha ka jingïalang kaba la pynlong ha District Auditorium, Tura.
Ha kaba ïadei bad kane haba ai jingkren, u Myntri Rangbah ula ñiew ïa kane ka jingplie kum ka sngi ka ban sah kynmaw bad sah khana ïa ka lawei, haba pynpaw ba ki samla ki dei ki bor ba khlaiñ bad ka spah jong ka Jylla Meghalaya.
Na ka liang jong u, u la pynpaw ba kumba 50% jong ki nongshong shnong ka Jylla ki dei kiba dang hapoh ka 20 snem, kaba pyni ïa ka jingdonkam ban btin lynti ïa ki samla ha ka lynti kaba dei.
Halor kane u Myntri Rangbah ula pynshlur ïa ki samla pule ba kin ngeit halade, haba ban jur ba ka jingjop ha ka eksam Civil Service kam shong eh tang na kaei ka longïing ba ki wan, hynrei ka shong eh ha ka jingngeit, ka jingtrei shitom bad jingim ba beit ba ryntih bad kaba bha.
U Myntri Rangbah u la kren ruh halor ka jingkongsan ban bud ïa ki lynti kiba dei ha ka jingpynkhreh ïa ki eksam, ban sam jingtip halor ki jing shem kumno ki leh haba mad ïa ki jingtynjuh bad ki lynti ba ki shim ha ka jingpule jong ki kaba manla ka sngi.
Ha kane ka sngi, ka AWS ka la aiti ruh ïa artylli ki dorkhas sha u Myntri Rangbah, ha kaba nyngkong ka kdew ïa ki jingdonkam ban pynbiang ïa ki jingtei bad ki tiar ki tar ban pynïaid ïa ka coaching centre ba kynthup ïa ki kamra klas, ki library bad ki tiar pule bad kaba ar ka long ban buh ïa ka rehabilitation centre ha Tura ban ïarap ïa ki samla ba la ngop ha u drok.
Haba ai jubab halor kine ki dorkhas, u Myntri Rangbah ula kular ba ka Sorkar, hapoh ka DREAM project (Drug Rehabilitation, Elimination and Awareness Mission) ka la dep ban mang T.15 klur ban kyrshan ïa ki lad ai jingïarap na ka bynta ki nongdih drok ha kylleng ka Jylla.
Na ka liang jong u, ula pyntip ba ka Tnad Social Welfare kan sa ai ka jingïatreilang bad ka AWS ban pyntreikam ïa ka rehabilitation centre ha Ri-lum Garo tang hapoh ka arbnai.
Kiwei pat kiba la ai jingkren ki kynthup ïa u Lamphang ka Ïingdorbar Thaw Aiñ Thomas A Sangma, u Deputy Commissioner ka West Garo Hills Vibhor Aggarwal bad kiwei kiwei kiba la donlang.
