50 hajar tyngka ka kuna ïa kiba khwai dohkha ka Fish Sanctuary Syntu Ksiar

Jowai, Ïaïong 12: Ka Jaiñtia Fishing and Environmental and Protection Association (JF&EPA), kawei ka kynhun hapoh Ri-lum Jaiñtia kaba ïaleh ban pynneh pynsah ïa ki dohum dohwah na ka jingshah pynïap pathar bad kaba peit ruh ïa ka khuid ka suba jong ki wah um.
Mynta ka sngi ki nongïalam ba hakhmat ka seng naduh u President ma D.H. Pde, u Vice President ma David Blah, u General Secretary ma M. Challam kila mih shakhmat ban pynsngew paidbah ïa ki jingmana ba tyngeh lada lap ïa kino kino ki nongpynjot ne pynjulor ïa ka wah Myntdu khamtam ka jingshah ktah ki dohum donwah.
Na ka liang u ma President ma D.H. Pde ha ïakren sha ki lad pathai khubor ula ong ïa ka JF&EPA la seng ïa ka naduh ka snem 1993 bad haduh mynta ka dang ïai bteng ban ai ka jingshakri ban pynneh pynsah ïa ki donum dohwah ha kylleng ki jaka, kum ka seng ka don shisha ka jingkitkhlieh ban ai jingïada ïa ka Wah Myntdu kaba dei ka nongbsa um bam umdih ïa ka sor Jowai baroh kawei.
Ula ïathuh na ka por sha ka por kiba ju pynmih ki jingmana ba ym bit ban Saitjaiñ, tong Sasi, khwai dohkha ha ki jaka bala mana, hynrei ki don pat ki briew kiba leh pyrshah ïa kane da kaba kim kheiñ shuh ïa kane ka jingmana kum ka seng kala kren shai ba lada lap nangne shakhmat kan pynshitom beit ïa ki katkum ki kyndon aiñ bad aiti sha ki bor ka aiñ.
U ma Pde ula pynsngew ha ki por ba ba jur u slap bad poi ka jingheh jong ka wah, hynrei bunsien ki breiw ki leit ban tong Sasi ha ki bynta ka wah Myntdu bad kane ka buh jingma ïa ki dohkha rit bad kane ruh ka long pyrshah ïa ki jingmana ka seng.
Kumba long mynta ha shi lynter jong ka Wah Myntdu man ka sngi ki briew ki wan ban saitjainñ bad kane ruh ka buh jingma ïa ki dohum na ka Acid kaba mih na ka saboh ym tang ka buh jingma ïa ki dohum hynrei wat ban pyndonkam ha ka liang ka um bam um dih, ong ma Pde.
Ha ka juh ka por u kyntu ïa ki kynhun treimon sngewbha ba kin ai ka jingïatrei lang ban khanglad ïa kine ki jingleh pyrshah khnang ban pynneh pynsah ïa ka jingbha jong ka Wah Myntdu. Da kaba kyntu ïa ka bor District ba kin pyntreikam mardor ïa ka kyndon 144 CrPC ban ïada ia ka Wah Myntud.
Wat ïa u Shyiap uba don ha shi lynter ka wah Myntdu u ma Pde ula ong ba ka donkam ban pynkhuid ïa u lyngba ka jingtreilang bad ka JHADC khnang ba ka wah kan long kaba jylliew ban ïoh jaka shong ki dohkha, hynrei kat ïa u maw uba don ha ki bynta ka wah Myntdu ym dei satia ban khlong ïa u
Shuh shuh ula pynsngew ba ïa ka jaka ri dohkha Fish Sanctuary kaba don ha Syntu Ksiar ïa kaba ka seng ha ryngkat ka jingïarap jong ki nongmihkhmat lem bad ki tnad sorkar kila lah ban pynlong ïa katei ka jaka kaba itynnad da ka jingdon ka View Point, ki lynti iaid kjat, ki dieng ba la dep thung nalor kiwei de ki jingtei kiba lah ban khring ïa ki nongwan peitkai.
Ula pyntip ha kaba ïadei bad ki bynta ka wah ba la pynlong Fish Sanctuary ha Syntu Ksiar la maham jur ba ym dei ban khwai dohkha bad ka kuna ïa kino kino kiba leh pyrshah ym dei shuh kaba 10 hajar tyngka la kyntiew sha ka 50 hajar tyngka da kaba kyntu ïa ki paidbah ban ïatrei lang.
Na ka liang ka seng ka don jingthmu ban pynlong ïa ka Syntu Ksiar kum kawei na ki jaka jngoh kai kaba itynnad tam da ka ba wanrah ïa ki lieng, ki jingker ba itynnad bad kiwei de, ula kyntu ruh ïa ki shnong ba marjan jong ka wah Myntdu ba kin ïasnohkti lang ban ai ka jingïada ïa ka Wah Myntdu ban lait na ki jingshah pynjulor da kaba bret pathar ïa ki ñiut ki nier.