Nongpoh, Nailar, 10: Ki Pulit ka Nongpoh Traffic ha ka sngi u Blei ki la bteng ban talasi ïa ki kali bad ki thuk thuk ar shaka kiba pynkheiñ aiñ bad ki bym burom ïa ki aiñ ñiah kali kaba ju wanrah pat bun ki jingjia ba sngewsih bad ki jingjia aksiden ha Ri-Bhoi.
Ki Pulit kiba la pynlong ka jingtalasi ha Umling bad Mawdiangum ki la ïoh bat bun ngut ki nongñiah ar shaka bad ki kali kiba pynkheiñ aiñ bad daiñ kuna ruh ïa ki kum ka jingpynsngewthuh ïa ki paidbah ba ki dei ban burom ïa ki aiñ ñiah kali na ka bynta ka jingshngaiñ jong ki bad kumjuh ruh ki nongleit nongwan ha shi lynter u surok National Highway.
Ha ka jingdaiñ kuna ki Pulit tang mynta ka sngi u Blei ki la ïoh ban lum haduh 50 hajar na ki nongpynkheiñ aiñ.
Lyngba kane ka kyrwoh, ki Pulit ki la kyrpad ïa ki paidbah ban burom ïa ki aiñ ñiah kali ban deng ïa ki seat belt bad kumjuh ruh ban phong ïa ki helmet haba pyndonkam ïa ki ar shaka na ka bynta ka jingshngaiñ jong ki ha ka leit ka wan kumba ka Ri-Bhoi District ka dei ka jaka kaba bun ki jingjia aksiden bad ka jingjia ba sngewsih tang namar ka jingthurmur haba ñiah kali bad kumjuh ruh ki ar shaka bad ha ka juh ka por ki la maham ruh ïa kito kiba ju mlien ban leh stunt ha ka sngi u Blei ba kim bit ban dang bteng ïa katei ka kam kaba ktah bad pynsyier mynsiem ïa ki nongleit nongwan bad wat ka jingim jong ki.
