Shillong, Jymmang 02: U Myntri ka Tnad Industries ma Sniawbhalang Dhar ula pyntip ba haduh 5 tylli ki kompani shimet kila wan shakhmat ban thep ïa ka Expression of Interest (EOI) jong ka Joint Venture ban iatreilang bad ka Sorkar Jylla ha kaban pynim pat ïa ka Mawmluh Cherra Cement Limited (MCCL).
Kat kum ka jingong jong u, “Ka jingïathep ïa ka EOI kala dep kut bad ka jingbishar ïa ki kot ki sla ka dang ïaid sha khmat mynta”.
U Ma Sniawbha ula ong ba ïa mynta hi ym pat lah ban tip mano napdeng kine ki kompani ki ba lah ban pyntrei ïa kane ka Joint Venture bad ka Sorkar Jylla.
Haba kylli, u Myntri u pyntip da kaba ong “Hadien ba ngi la dep jied ïa ka kompani ban shimti, ka jingïakren kan sa long halor ki kyndon ka jingshimti ban pynïaid ïa kane ka kompani pynmih dewbilat jong ka sorkar Jylla”.
U Myntri u pyntip ba ki kyndon ki kynthup ïa ka jinglong trai ïa ka karkhana, ka bhah ban iasam hapdeng ka Sorkar Jylla bad ka kompani, ka jingsiew khuid ïa ka ram ka shah jong ka MCCL bad kumjuh ruh ka jingïapynbeit halor ki Nongtrei ka karkhana kiba dang don hapoh ka kam.
Ka kynhun Myntri ka Sorkar Meghalaya Democratic Alliance (MDA) kala rai ha ka 18 tarik Naitung 2021 ban pyntreikam noh da ka Joint Venture ha kaban pynim pat ïa ka MCCL, kaba la jia hadien ka jingiasyllok bad ki kynhun bapher bapher ka thaiñ Sohra kynthup ka Mawmluh Elaka bad Hima Sohra.
Namar ka jingpang swai kaba don ha MCCL ka ba la sangeh pynmih dewbilat da ki bun bun bnai, u Myntri Rangbah ka Jylla Conrad Kongkal Sangma ula pyntip ba ki don satang lai tylli ki lad kumno ban leh ïa ka MCCL kata ban bei pisa da ka Sorkar Jylla kaba long kumba T. 190 klur, ban pynïaid da ka Joint Venture lane ban khang khyrdep noh shisyndon ïa ka karkhana.
U Myntri Rangbah ka Jylla ula pyntip ba namar baka Sorkar Jylla ka don hapdeng ka jingkyrduh pisa, kam don satia ka lynti ïa ka Sorkar Jylla ban bei tyngka haduh T. 190 klur ban pynim ïa ka karkhana. U ong ba ka lynti kaba sah hi ka dei tang ka jingkhang khyrdep bad ka jingpyntreikam ïa ka Joint Venture.
Hynrei da ka jing-iamynjur lang jong ki kynhun bapher bapher ka Mawmluh Elaka bad Hima Sohra, ka Sorkar kala shim ïa ka rai ban ïaid da ka Joint Venture.
