Jowai, Naiwieng 01: Ka West Jaiñtia District Sports Association, (WJDSA) Jowai shen kan sa sdang noh ïa ka lympung ïalehkai phutbol jong ka kyrdan ‘Super Division Football Tournament – 2024’ haka 5 tarik u Naiwieng, 2024 ïa kaba la tip kum ka “U Kiang Nangbah Memorial Trophy” bad ïa kane ka lympung yn pynïakhun ha madan Kiang Nangbah Stadium, Dongmihsngi Jowai.
Naka bynta ki kynhun ki ban ïakhun ïa kane ka kyrdan ki don haduh 8 tylli kata ka Demthring SC, Shangpung Lumiawmushai, Sailung Ialong, Nangbah Mulang, 7 Wasa United, Ladthadlaboh SC, Mukhla Raij Sc bad ka Wahiajer.
Ha ka sngi sdang jong ka 5 tarik u Naiwieng, 2024 ki kynhun ki ban ïakhun nyngkong ki long ka Demthring SC pyrshah ïa ka Shangpung Lumiawmushai haka por 11 baje mynstep, katba ka Nangbah Mulang kan ïakhun pyrshah ïaka Wahiajer haka por 2 baje nohphai sngi.
Ha ka juh ka por la kyrpad ïa ki team ban wan biang por. Lada ïakhait ha ki point yn pyndonkam da ka Goal Difference la dang ïakhaid ha ka Goal Difference yn pyndonkam da ka Goal for. Yn pyndonkam da ka Who beat Who lada ïakhaid ha baroh ki liang.
La kyrpad ïa ki Team ban lehkhuid ïa ki Dressing Room bad kumjuh ruh ïaki Substitute Bench. Yn ai lad 5 ngut ki Substitute bad ban bujli tang 3 sien ha baroh ki 5 ngut ki Substitute. Ïa ka prokram jong ka jingïakhun lah ban pynkylla hadien lada donkam.
