Mawkyrwat, Naitung 01: Ka jingïalehkai Semi Final jong ka lympung kynjatbol ba la tip kum ka South West Khasi Hills District Level Inter-School Subroto Mukharjee Cup Football Tournament 2022 kan long ha ka 5 tarik u Naitung, 2022 ha madan Artificial Turf, MDSA, South West Khasi Hills District, Mawkyrwat ha kaba ki don saw tylli ki kynhun ki ban sa mih madan ban ïa khun ban ïoh rung sha ka Final.
Haba phai ha ka jingïakhun ha ka Quarter Final kaba la long ha madan Pyndenïewlyngdoh, Nonglang mynta ka sngi ka Rodphod Secondary School ka la jop da 4 – 3 kol ïa ka Rangthong Higher Secondary School lyngba ka Tie Breaker. Ka Mawjaraiñ Presbyterian Secondary School pat ka la jop da 5 – 2 kol ïa ka Lyngdoh Wanniang Secondary School, Marshillong ha kaba ïa ki kol la thep da u Baiohbok Thyrniang (21 minit), u Pynshaitbor Snaitang (26 minit), u Kyrshanborlang Khardewsaw (31 minit, u Wankordorlang Nongsiej (39 minit) bad na u Shainingwell Iawphniaw (60 minit).
Nangta, ka Jingïaseng Kynthei Mawkyrwat Presbytery Higher Secondary School, Mawkyrwat ka la jop ha ka Tie Breaker da 4 – 3 kol pyrshah ïa ka Kerlin’s Secondary School bad ka Balang Mawlangwir Higher Secondary School pat ka la jop pyrshah ïa ka Horirai Memorial Higher Secondary School, Photjaud-Rangthong da 3 – 0 kol.
Kumta ki saw kynhun kiba la rung sha ka Semi Final ha ka South West Khasi Hills District Level Inter-School Subroto Mukharjee Cup Football Tournament 2022 ki long ka Rodphod Secondary School, ka Mawjaraiñ Presbyterian Secondary School, ka Jingïaseng Kynthei Mawkyrwat Presbytery Higher Secondary School, Mawkyrwat bad ka Balang Mawlangwir Higher Secondary School.
