5 lak duhnong ki longïing trei Job Card, hap pyntrei hi u BDO ïa ki kam pynroi ha Rngibah

Shillong, Naiwieng, 17: Ka shnong Rngibah kaba hap hapoh ka Mawkynrew C&RD Block ka dei ka shnong kaba dang donkam shibun bun ki kam pynroi la ka long ha ka lynti ka syngkien, ka umbam umdih, ka bording bad ka koit ka khiah.
Kane ka shnong ka dei kaba ladep ban rakhe ïa ka jingdap 100 spah snem bad bun na ki nongshong shnong ki dei kiba dang donkam ïa ki song pynroi namarba haduh mynta ka shnong ka dei kaba don hapdeng ka kynrum kynram ha ki kam synshar khadar.
Ka KSU, Mawkynrew Unit ka dei ka kynhun kaba ju ïarap ban tynrong lem ïa ki jingeh jong ki nongshong shnong na ka por sha ka por.
Ha kaba ïadei ka rep ka riang kaba dei u budlum jong ka trei ka ktah ba manla ka sngi ka shnong Rngibah ka la ïakynduh jingeh namar bym biang shuh ka kit ka bah ïa ki mar rep ban pynpoi sha surok.
Ka shnong Rngibah ka dei napdeng ki shnong ba don ha shiteng riat jong ka thaiñ Mawkynrew ha kaba ki briew ki im da ka rep ka riang.
Hynin ka sngi Saitjaiñ, u Block Development Ophisar (BDO) ka Mawkynrew C&RD Block u Bah G. Dhar ryngkat ka jingsynran lang jong ki nongïalam ka KSU Mawkynrew Unit ki la hiar sha ka shnong Rngibah ban leit jngoh ïa ki jingdonkam jong ki nongshong shnong.
Kane ka jingleit jurip jong u BDO ïa ka shnong Rngibah ka long hadien ar snem ba u la ïohi ki jingduna jong ka shnong.
Ka jingbym biang ha ka synshar khadar ka la pyndkoh lut ki kam pynroi ha ki 20 snem ba la leit noh bad ki longiing longsem ki la duhnong lut ha kaba ïadei bad ka jingïoh pdiang ïa ki song jingïarap na ka Sorkar khamtam ki skhim ka Sorkar India kum ka kam NREGS.
Ha ki 20 snem ka la long ka jinglyniar ïa ki paidbah kiba kwah ïa ki kam pynroi kum ki lynti ïaid kjat, ki lad jingïarap na ki tnad Sorkar baroh.
Palat 60 hajar, shisnem ki longiing ki duhnong na kaba ki dei ban ïoh trei ïa ki kam na ka skhim MGNREGS.
Ka shnong Rngibah don 150 tylli ki longiing lada kheiñ kyllum kawei ka longiing kaba ïoh trei Job Card bad ki duhnong T. 5 lak shisnem tang ka bynta kaba ka Sorkar ka ai ïa kaba ki trei.
Hynrei mynta ha kane ka shnong ka la sdang wan ka jingshai bad jingshemphang hadien ba ki paidbah kiba kwah trei ïa ki kam na ka skhim MGNREGS ki la ïohlad ban trei biang hadien ba u BDO u la shim hi ha ka kti lajong ban pyntyllun ïa ka kam.
Ka 16 tarik, Naiwieng, kan long ka sngi kaba ban sah jingsah jingkynmaw ïa ka shnong haba ki paid nongshong shong ki la tih ïa ka madan phutbol khlem da pyndonkam ïa ka puhshilum.
Ha jingtur jong u BDO ha ka shnong Rngibah u la lum da ka jingïalang ïa ki paid nongshong shnong ban ïoh jingshai kaei kaba ki paidbah ki donkam bad paidbah ruh ki la ïohlad ban buh jingkylli hakhmat u BDO ban ïoh jingpynshai.