Shillong, Nohprah, 13: Ka Chairperson jong ka All India Trinamool Congress (AITC) ka Mamata Bannerjee ha ka sngi Ba ar ka la aiti da ka Cheque kaba shongdor T.5 lak sha ki bahaiing hasem jong ki san ngut ki lanot kiba la shah siat ïap ha ki Pulit bad ha ki Forest Guared ka jylla Assam ha ka shnong Mukroh, West Jaiñtia Hills District ha ka step 22 tarik u bnai ba ladep.
Kane ka jingai jingïarap kaba mar T.5 lak sha ki bahaing hasem jong ki san ngut ki lanot ka ïaryngkat mar katjuh kumba la ai jingïarap da ka Sorkar Jylla dang shen.
Dang shen u Myntri Rangbah u la hiar hi dalade sha ka shnong Mukroh ban leit sngewlem bad ban ai ïa ka song jingïarap pisa kaba mar T.5 lak sha ki bahaing hasem jong ki san ngut ki lanot.
Ka Mamata Bannerjee ka la pynpaw ïa ka jingsngew bitar pyrshah ïa ka Sorkar Meghalaya Democratic Alliance (MDA) halor ka jingsngap jar bad dawa ban leh eiei pyrshah ïa kito kiba donkti ban siat ïap ïa ki nongshong shnong jong ka shnong Mukroh.
Ka Banerjee ka la ïathuh ruh ba ka Sorkar West Bengal ka ju ai jingkyrshan pisa kum ka bailutksan haba don kano kano ka jingjia.
“Ha ka jylla jong nga, lada don kino kino ki jingjia ba sngewsih, nga ju ai jingïarap bailutksan sha ki bahaing hasem jong ki lanot,” ka la ong.
Ha ka jingaiti ïa kane ka song jingïarap sha ki bahaing hasem jong ki san ngut ki lanot, la synran lang da u State President ka TMC u Bah Charles Pyngrope, u Nongïalam jong ka Liang Pyrshah u Dr. Mukul Sangma bad ki nongïalam ka party.
