5 bnai ki jingdawa ki la tyllun hynrei dang ïai sngap mynthi ka Sorkar MDA

Mawkyrwat, Nohprah 21: Ki lai tylli ki shnat treikam jong ka KSU, kata, ka KSU Lawbah Border Area Circle, ka KSU Balat Border Area Circle bad ka KSU Sawsymper Circle ryngkat ka jingïatreilang bad ka KSU jong ka South West Khasi Hills District, ha ka sngi Saitjaiñ ki la pynkut noh ïa ka ‘Signature Campaign’ kaba la ïaid mynta la 5 bnai kynthih ban dawa na ka Sorkar Meghalaya Democratic Alliance (MDA) ba la ïalam da ka National Poeple’s Party (NPP) ban kyntiew kyrdan Civil Sub-Division ïa ka Mawsynram C&RD Block.
Lah ban kdew, lyngba kane ka Signature Campaign ba khatduh, ka KSU ka la pynbna paidbah ba ka seng kan pynjur ïa ki jingïakhih halor kane ka mat jingdawa kaba ki paidbah jong ka thaiñ ki la donhok ban ïoh ïa ka Civil Sub-Division namarba ka Mawsynram C&RD Block ka dei ruh ka Block kaba la rim tam hapoh ka Jylla Meghalaya ïa kaba la pynkha naduh ka por jong ka Sorkar Assam ha u snem 1962 bad kaba la tam ruh haduh 10 snem shwa ba ka Meghalaya kan ïoh ïa ka jylla bapura.
U President jong ka KSU Balat Border Area Circle u Bah Bonsen Snaitang haba kren ha ka jingïalang u ong, watla na ka liang ka KSU ka ladep ban pynlong ïa ki jingïakhih ba jaijai ha ki jaka bapher bapher ha kine ki san bnai, hynrei ka Sorkar Jylla haduh mynta ka dang sngap mynthi khlem patiaw.
U la maham da kaba tyngeh ba ka KSU shen kan sa pynlong da kiwei pat ki jingïakhih ba tyngeh kiba lah ruh ban ktah ïa ka shongsuk shongsaiñ bad hangta ka Sorkar kan hap ban shim hi ïa ka jingkitkhlieh.
Kiwei dei kiba la don bynta ha kaba ai jingkren ki long u Organising Secretary jong ka KSU South West Khasi Hills District u Bah Puljohn Wanniang, u President jong ka KSU Lawbah Border Area Circle u Bah Samborlang Shabong bad kiwei kiwei.