Shillong, Naiwieng, 26: Ka Khun Hynniewtrep National Awakening Movement (KHNAM) State Youth Wing ha ka sngi Baar ka la kyntu ïa ka Sorkar Jylla ban siew noh ïa ka tulop ba sah pongding jong ki Home Guard Volunteers, kiba ju ïarap ïa ki Pulit ban pynïaid kali ha nongbah Shillong.
Ha ka shithi ba la phah sha u Symbud Myntri Rangbah ka Jylla uba khmih ïa ka tnat Kam Pohing Bah Prestone Tynsong, u Working President ka KHNAM SYW Bah J. Pyngrope u la kynnoh ba ki Home Guard kiba ju ïarap ban pynïaid kali ha kylleng ki bynta jong ka sor Shillong ki shym la ïoh tulop satia da ki bnai.
“Ka jingbym ïoh tulop ka la buh jingeh ïa kine ki Home Guard Volunteer namarba ki hap ban kyrshan ruh ïa la ka jong ka iing ka sem. Ngi la ïakynduh ïa ki bor ba dei peit jong ka tnat Home Guard bad ïa ki bor ba dei peit jong ka Traffic Police halor kane ka kam bad la sngewthuh ba ka jingpynslem ban siew ïa ka tulop ka dei hi namar ka jingpynslem jong ka Sorkar ban mang ïa ka pisa,” u la ong.
“Namarkata, ngi kyntu ïa ka ophis jong phi ban shim ïa ki lad ki lynti kiba pynthikna ba ka pisa bym pat siew ïa ki Home Guard Volunteer dei ban pynkhuid noh kham kloi khnang ba ki bahaing hasem kin dup ïohlad ban rakhe ïa ka lehniam Christmass da ka jingkmen,” u la bynrap.
U Bah Pyngrope u la kyntu ruh ba ha ki por ban sa wan, ïa ka tulop jong kine ki Volunteer dei ban siew tisata khnang ba kan ym ktah ïa ka iing ka sem jong ki.
“La pyntip ruh ïa ngi ba kine ki Home Guard la shu thung khlem kano kano ka shithi thungkam. Ngi kyrpad ba nangne shakhmat haba thungkam Temporary ne Permanent ruh dei ban sa ai da ka shithi thungkam,” u la bynrap.
