4th Division: Mar 3 kol ïakhaid ka Diengpasoh SC bad ka Mawlyngngad SC

Shillong, Nailar 14: Ki jingïakhun kaba la long hynne ka Lah Sngi U Blei jong ka Shillong Sports Association Under-20 4th DIVISION Football League 2023, kaba la pynlong ha SSA Stadium First Ground, Polo.
Haba phai sha ka jingïalehkai kaba nyngkong kaba la sdang ha ka por 2 baje nohphaisngi hapdeng ka Laitkroh SC pyrshah ïa ka Mawkriah West SC, la hap ban pynsangeh noh namar ka jingjur palat u slap ha kaba kine ki ar kynhun ki la ïakhun tang 45 minit.
Haba phai pat sha ka jingïalehkai kaba ar, kaba la sdang ha ka por 4 baje jan miet, hapdeng ka Diengpasoh SC pyrshah ïa ka Mawlyngngad SC ka la jam sha kaba kut da ka jingïakhaid. Baroh ar kynhun ki la ïa pynibor kawei ïa kawei khlem da pyndem bad ïa khyrwit mar lai kol.
Na ka liang jong ka Diengpasoh SC, baroh lai kol la thep hi da u Bapynkmen Kharsati (14 min, 19 min & 39min).
Katba na ka bynta ka Mawlyngngad SC kine ki kol ki la wan lyngba u Nathaneil Kharbyngar u ba la ïoh ban pynkhihjar ar sien, kata ha ka minit kaba 23 bad 62 minit nangta bud sa ka kol na u Badonbok Mawthoh ha ka minit kaba 54
Yn bteng ban pyntyllun biang ïa ki jingïakhun ha ka 16, Nailar 2023, kata lashai ka Sngi Balang, bad ka por kan long beit thik 2 baje nohphai sngi, ha kaba ka Dilingiem YSCWA kan aireng pyrshah ïa ka Lamlynti SC bud sa ka jingïalehkai kaba ar ha ka por 4 jan miet hapdeng ka Umrynjah SC pyrshah ïa ka Lumpyngngad SC bad ka madan kan long ha SSA Stadium First Ground, Polo.