43 tylli ki case bad 54 ngut la kem ha ka kyndon NDPS ha ki 15 snem ha WKH

Nongstoiñ, Jymmang 04: Ka District Level Nasha Mukht Bharat Abhiyan, (0.2) campaign West Khasi Hills District, hapoh ka jingpynïaid jong u Deputy Commissioner West Khasi Hills District, u ba dei u Chairman jong kane ka Committee bad ka ophis jong ka District Social Welfare Office (DSWO) Nongstoiñ, ki la ïoh ban plie ïa ka District Level Nasha Mukht Bharat Abhiyan, (0.2) campaign, ha Trysem Hall, DC Ophis.
Ïa kane ka campaign la sdang da ka Ministry of Social Justice & Empowerment Govt of India, ha ka 15 tarik u Nailar 2020 ha ki 272 tylli ki District kiba la ithuh kum ki District kiba jyllei bha ha ka jingpyndonkam ïa u drok. Ka thong jong kane ka campaign ka long ban pynlong ïa ka Ri India, ka Ri kaba lait na ka jingpyndonkam ïa u Drok bad ka West Khasi Hills ruh ka la shah kynthup kum ka Distrik kaba la jyllei bha ha ka jingdih drok.
Ïa kane ka prokram la wan ban plie paidbah da u Bah Gabriel Wahlang, MLA Nongstoiñ, kum u Kongsan ha ka jingïadon ryngkat lang jong u Bah H.K Thabah MCS (ADC) u ba la pynïaid ruh ïa kane ka prokram, u SP ka West Khasi Hills, bah B.D Marak (MPS), Kong D. Pakynteiñ (DSWO) bad member secretary (NMDA), Dr. M. Sohliya (DMHO), Dr Marweiñ, Dr. Lyngkhoi, Kong D.Hujon DSEO, Bah W. Shabong CDPO, Kong D.Wahlang (Theo Integrated Rehabilitation Centre).
Kiwei pat ki dei ki heh sorkar bad ki nongtrei sorkar na ki tnad ki bapher bapher, ki rangbah shnong, ki khynnah skul, ki sengbhalang, Urban Mission jong ka Balang Presbyterian New Nongstoiñ lem bad kiwei kiwei kiba ju ïa don bynta lang.
Haba kren kum u Kongsan ha kane ka sngi, u Bah Gabriel da ka sur kaba jam u la kyntu ban ong, ‘Em Ïa U Drok bad Hooid Ïa Ka Jingim’. Kum u nongmihkhmat jong ka Nongstoiñ, u dap da ka jingsngewkhia ban ïohi ïa ka jingkiew sted jong une u jingdih kynsha, u ba la pynjot ym tang ïa kiba dih. Hynrei, ïa ki kmie ki kpa, kiba haïing hasem bad ïa ka imlang shalang hi baroh kawei.
U la ong ba 65% jong ka Ri ki dei ki samla, kiba dei ki lawei ban ïalam ïa ka ri ha ki bynta kiba pher kiba pher. Hynrei lada ki samla ki shah ngop noh ha kum kine ki jingdih kiba sniew shano ka lawei jong ka Ri kan don.
U Bah Gabriel u la ban jur ïa ki samla ba kin long kiba stad ban ym jied bakla ïa ka lynti, wei ba la bakla ka la shem shitom ban lait na ki ‘liewlep jong u drok. U la buh ka jingkyntu ïa baroh naduh ki nongsynshar shnong, ki nonghikai, bad baroh ban ïatreilang ban pyllait ïa ka dong ka thaiñ na u drok bad ban wanrah pat ïa ka suk ka saiñ hapoh ki ïing ki sem, ki shong ki thaw jong ka Nongstoiñ.
La ïoh ruh ban pyllait paidbah ïa kawei ka sur jingrwai kaba la shna bad pynbit pynbiang da u Bah Josephas Thongni, kaba la pynmih da ka District Social Welfare Officer Nongstoiñ, ka jingrwai kaba rah ïa ka khubor ban ïalap pyrshah ïa u drok, bad ban wanlam pat ïa kiba la kyrni ha ki jingdih kiba sniew sha ka jingim kaba thymmai.
Kiwei pat kiba la ai jingkren ha kane ka sngi ki khyntup ïa u bah B.D Marak SP ka West Khasi, u ba la ong ba ka West Khasi Hills, ka la nang kiew ha ki kam khaïi bad dih drok kaba la buh jingma ïa ka imlang ka sahlang.
Baroh ki case hapoh ka NDPS Act naduh ka 4 tarik Jylliew 2011 haduh 4 tarik Jylliew 2025 ki long haduh 43 tylli bad napdeng kine 54 ngut la shah kem kaba kynthup ïa 53 ngut ki Shynrang bad kawei ka Kynthei.
U la kyntu ïa ki kmie ki kpa bad ki longïing kiba don ïa ki khun ki kti kiba kyrni dih drok, ba kin ym buhrieh hynrei ban wan shakhmat ban ïoh ïa ki jingïarap bad pynbeit ïa ki khun ki kti jong ki. Lada ki paidbah ki lap ne shem ïa kino kiba dih ne khaïi drok, kim dei ban tieng ne salia ban phone ha u number 112 ban pyntip sha ki pulit lyngba utei u phone number.
Hapoh West Khasi Hills, ki la don bun ngut ki briew kiba la ïoh ïa ka jingpang AIDS bad 11 ngut napdeng kine ki dei ki khynnah samla namar ka jingkyrni ha u drok.
I Kong D. Pakynteiñ I ba dei I DSWO Nongstoiñ, I la kyntu jur ïa baroh, khamtam eh ïa ki khynnah samla kiba dang khie dang san, ba kin ym shah ïalam bakla ha ki jingdih drok. Ka la kyntu ruh ïa ki jaka pule ba kin shimkhia halor kane ka bynta bad ha kajuh ka por ban ai ki jinghikai sha ki khynnah, ba kin lah ban ïaleh pyrshah ïa ki jingeh jong ka jingim ha ka lynti kaba dei.
Da kawei ka sur, “Ong Em Ïa U Drok, Ong Hooid Ïa Ka Jingim”, la ïoh sngew na baroh kiba don hapoh Trysem Hall, kum ka dak ban kiar na u drok bad ban im ka jingim kaba khuid kaba kmen bad kaba myntoi ïa ka imlang ka sahlang.