Shillong, Naitung, 08: Ka tnat Building jong ka Khasi Hills Autonomous District Council (KHADC) haduh mynta ka la ïoh pdiang 400 tylli ki aplikeshon ba la pan jingbit ban shna ïing.
Ïa kane la pyntip da u Executive Member i/c Building u Bah Paul Lyngdoh haba jubab ïa ka jingkylli ba la wanrah da u Nongïalam ka Liang Pyrshah u Bah PN Syiem ha ka sngi khatduh jong ka dorbar lyiur jong ka Ïingdorbar Thawaiñ ka KHADC kaba la long ha ka sngi Thohdieng.
U Bah Paul u la ïathuh ba ka Executive Committee jong ka KHADC ka la thaw ïa ka Khasi Hills Building and Structure Regulatory Authority (KHBSRA) na ka bynta ban pyntreikam ïa ka Meghalaya Building Bye-Laws hapoh u pud u sam jong ka Council hynrei lait noh ïa ki shnong kiba hap hapoh ka Shillong Normal Areas.
Ha kaba ïadei bad kito kiba shim ram na ki Bank ban shna iing, u Bah Paul u la ong ba la ai ïa ka jingthoh ban pynthikna ba kin sa ïoh ïa ka syrnot pan jingbit ban shna iing ynda ki Bank ki la mynjur ïa ka aplikeshon jong ki bad ka KHADC ka la pyntreikam ïa ka Meghalaya Building Laws 2021 katba ka Council kam pat don ïa la ka jong ka aiñ shna ïing.
U la pyntip ruh namar ka jingduna jong ki nongtrei khamtam ki Engineers, ka KHADC ka ladep mynjur ban buh da ki Technical Officer jong ka MUDA hapoh ka ophis jong ka Council.
Katkum ka jingong jong u, ka Council kan ym lah ban don ïa ka aiñ shna iing ka ban ïatakhuh bad ka National Building Code ïa kaba la pyntreikam hapoh ka ri baroh kawei.
U la pynshai ruh ba ïa mynta ka jingpan jingbit kaba ki paidbah ki hap ban shim na ka District Council kan long ha kito ki jaka ba hap hapoh ka jngpeit jong ka KHADC, katba ha ki jaka Sorkar ki hap ban shim na ka Sorkar bad na ka bynta kito kiba shu shna ing tang shi mala bad ki ing dieng kin hap ban pan jingbit na ki Dorbar Shnong.
U la ïathuh ba ka Council ka la peitngor bha haba pyntreikam ïa kane ka aiñ shna iing na ka daw ba mynta ki la sdang mih ki Home Stay, ki Guest House, ki Hotel bad kiwei kiwei.
