400 klur yn ïoh ka Meghalaya ïa ka Performance Incentive Grant na ka Jal Jeevan Mission

New Delhi, Lber, 30: Ka Jylla Meghalaya ka la shah jied ban ïoh pdiang T.400 klur lyngba ka Performance Incentive Grant (PIG) na ka bynta u snem 2021-22 hapoh ka Jal Jeevan Mission (JJM)- Har Ghar Jal ban pynbiang ïa ki um kor sha manla ki thliew iing ha ki jaka nongkyndong ha shuwa jong u snem 2024.
Hynriew tylli ki jylla kiba la shah jied ban ïoh pdiang ïa ka song jingïarap pisa lyngba ka Performance Incentive Grant na hapoh ka JJM ki long ka Arunachal Pradesh, ka Manipur, ka Meghalaya, ka Sikkim, ka Tripura bad ka Jylla Himachal Pradesh.
U Myntri ka tnat Jal Shakti ka Sorkar Pdeng, u Gajendra Singh Shekhawat u la ai jingmynjur ban pyllait ïa ka pisa T. 1,982 klur namar ka jinglah ban pyntreikam bha sha kine ki hynriew tylli ki jylla, ha kaba ka Arunachal Pradesh ka la ïoh T. 542 klur, ka Manipur T. 120 klur, ka Meghalaya T. 400 klur, ka Sikkim T. 70 klur, ka Tripura T. 100 klur bad Himachal Pradesh T. 750 klur.
Ka jingai ïa kane ka song jingïarap pisa ka long namar ka jinglah ban pyntreikam bha hapoh ka Jal Jeevan Mission ka la wanrah ïa ka jingïaleh hapdeng ki jylla / UT, ka ban ïarap ïa ka jingpyntrei stet bad ka jingpynthikna ïa ka jingïoh um hapoh kane ka mishon. Kane ka mishon ka thmu ban pynbiang um kor sha manla ki thliew iing ha ki jaka nongkyndong shuwa u snem 2024.
Wat hapdeng ka jingwan lynshop jong ka khlam COVID-19 bad ki jingkhangdam ha kine ki ar snem ba ladep, ka jingpyntreikam ïa ka Jal Jeevan Mission ka la ïaid ryntih bad ha une u snem mang tyngka, palat 2.05 klur tylli ki longiing ha ki jaka nongkyndong ki la ïoh ïa ka um kor.
Mynta, ka Andaman & Nicobar Islands, Dadra& Nagar Haveli bad Daman & Diu, Goa, Haryana, Puducherry bad Telangana ki la long ki jylla / UT ‘Har Ghar Jal’ bad manla ka iing ha ki 106 tylli ki distrik bad 1.44 lak tylli ki shnong jong ka ri ki don ïa ka um kor.
Naduh ba la pynbna ïa ka Jal Jeevan Mission ha ka 15 tarik u Nailar, 2019, haduh mynta, palat 6.10 klur tylli ki iing ki la ïoh ïa ka um kor bad kane ka la kyntiew ïa ka jingai um lyngba ki kor na ka 3.23 klur (17%) sha palat 9.34 klur (48.3%) ki iing ha ki jaka nongkyndong jong ka ri.
Ïa ka mang tyngka na ka bynta ka Jal Jeevan Mission na ka bynta u snem 2022-23 la kyntiew sha ka T. 60,000 klur. Ban pynkhreh ïa ka kam pynpoi um kaba heh katne bad ban ai jingtip ïa ki briew shaphang ka lawei, ha ka 23 tarik u Rymphang, 2022, ka la don ka jingïamir jingmut lyngba ka Webinar hadien ka mang tyngka.
U Myntri Rangbah Duh, u Narendra Modi bad u Myntri uba khmih ïa ka tnat Jal Shakti, u Gajendra Singh Shekhawat, u Myntri Khynnah, u Prahlad Singh Patel bad ki nongïalam ha kine ki kam, ki jaka pule, ki dkhot ka imlang sahlang bad ki riewshemphang WASH ki la ai ïa ki jingbatai bad ki jingai jingmut jong ki halor ki rukom ban pynstet ïa ka jingpyntreikam.
Ban pynstet shuh shuh ïa ki kam ba la pynkhreh, u Myntri ka Sorkar Pdeng u dang leit jngoh ïa ki jylla bad u dang ïakren bad ki jylla ban pynstet ïa ka kam.
Shen la pynlong ïa lai tylli ki Regional Conference hapoh ka jingpynïaid jong u Shekhawat ha u Rymphang bad u Lber ha ki jaka bapher bapher ban pynbeit ïa ki jingeh haba don kum kine bad ban pynshlur ïa ki jylla/UT ba kin peit bniah ïa ka jingpyntreikam katkum ka nongrim jong ka JJM kaba long ka jingtrei kaba kylluid, kaba pynïaid da ka imlang sahlang bad kaba long katkum ki jingdonkam ha ki jaka bapher bapher.
La pynlong ruh ïa ki jingïamir jingmut bad kito kiba don kti ha kine ki kam ban pynbeit ïa ki jingeh ha ka jingpyntreikam ïa kane ka mission.
Ka Sorkar Himachal Pradesh ka la sdang ïa ka jingpynkhreh bad ka jingpyntreikam ha ki shnong ban pynthikna ka jingïoh um kor ha ki shnong ha ki jaka nongkyndong.
Ki jylla ka thaiñ Shatei Lammihngi, watla ki don ha ki jaka kiba long lum bad kiba tap da ki khlaw, ki la pyntreikam ïa ka JJM da kaba stet.
U Shekhawat u la pynlong katto katne ki jingïalang ban peit ïa ki kam ha ryngkat ka jingleit jngoh ïa ki jylla ka thaiñ na ka bynta ban pynstet ïa ka jingpyntreikam. Ka National Jal Jeevan Mission ka la phah katto katne tylli ki kynhun jong ki riewshemphang sha kine ki jylla ba kin pynkhreh kham bha bad pyntreikam kham stet ïa ka kam.