Shillong, Risaw, 19: Arngut ki nong India ba la suba ba ki dei kiba donkti ban shalan tuh ïa u soh Apple na khappud ka East Khasi Hills sha ka ri Bangladesh ki la shah kem ha ki shipai Border Security Force (BSF) ha ka sngi Thohdieng.
Ki shipai BSF jong ka 4th Battalion Meghalaya Frontier kiba ap pahara ha surok Dawki-Lyngkhat ha ka thaiñ Pyrdiwah, ki la ïoh bat ïa ki arngut ki nong India bad ar tylli ki kali kawei ka kali Alto bad ka kawei ka kali Maruti Van ba la thep 40 synduk u soh Apple.
Ha ka jingtohkit, ki nongñiah jong kine ki ar tylli ki kali kim shym la lah satia ban ai ïa ka jubab kaba shai bad ïa ki kot ki sla kiba biang halor ka jingkit ïa ki soh Apple.
Ïa kine ki arngut ki briew, ïa ki kali bad ïa ki soh Apple ba la kurup la aiti noh sha ka ophis Custom, Pynursla.
