Shillong, Risaw, 03: Ka Myntri ka Koit ka Khiah jong ka Sorkar Jylla ka Dr. Ampareen Lyngdoh ha ka sngi Palei ka la pyntip ba ka Jylla ka la ïoh pdiang shuh shuh sa 40 tylli ki Seats na ka bynta ka jingpule Medical hadien ka jingai jingmynjur jong ka Sorkar Pdeng ban sdang noh ïa ka PA Sangma International Medical College jong ka University of Science and Technology, Meghalaya (USTM) kum ka Private Medical College ba nyngkong tam ha ka jylla Meghalaya.
Ha ka jingïakren bad ki lad pathai khubor, ka Dr. Ampareen ka la ong, “u Myntri Rangbah Conrad K Sangma u la ai khublei ïa ki (USTM) halor ka jingsdang ïa ka Medical College banyngkong eh ha ka jylla Meghalaya ban pynïaid na ka shlem pule jong ki. Ngi sngewkmen ruh ban ïoh ïa kane ka jingtip mynta ka sngi ba ngi la ïoh shuh shuh sa 40 tylli ki Seat na ka bynta ka jingpule Medical ka ban plie lad ïa ki samla ka jylla Meghalaya, kiba angnud ban pule ïa ka doktor ne MBBS.”
“Na ki 40 tylli ki seat, 20 tylli ki dei kiba hap hapoh ka Full Scholarship katba 20 Seat kin dei kiba hap siew tang shiteng dor. Ngi ai khublei ïa ka USTM bad ngi kyrmen ba ki samla ka jylla Meghalaya ïoh jingmyntoi na kane ka kabu ksiar ka ban sa wan,” ka la bynrap.
Haba pyntip ba ka samoi pule jong u snem 2024-25 ka la sdang, ka Myntri ka la ong, “ngin sa pynmih la ka jong ka jingpynbna na ka bynta kane namarba kine ki Seat ki dang wan mynta. Ngin sa pyntip sha ki nongshong shnong lyngba ki lad pathai khubor bad ïa ka jingpyntip yn sa pynmih ha ki khyndiat sngi ki ban sa wan.”
Katkum ka jingong jong ka Myntri, ki Medical Seat ha Meghalaya ki la kiew sha ka 133 tylli, ha kaba 93 tylli la ai na ka Sorkar India.
La ai jingbit ïa ka College ban shim haduh 150 ngut ki samla pule ha ka samoi pule bad mynta ka Sorkar ka dang ap ïa ka jingmynjur na ka National Medical Commission (NMC).
Haba kylli, ka Dr. Ampareen ka la ong, “nga la leit jngoh ïa ka Institute bad nga ïohi ba ki la long kiba la pynkhreh. Ki jingpynkhreh na ka bynta ka snem ba nyngkong, baar bad balai katkum ka jingdonkam jong ka NMC, nga tharai ki ladep ban shna. Phin ym ïoh ïa ka NoC lada phim don ïa ki jingdonkam ban sdang ïa ka Medical College.”
Halor ka jingpan ram kaba 200 klur da ka USTM na ka bynta ban pynstet na ka bynta ban shna ïa ka Institution kaba 400 jingthiah, ka Myntri ka la ong, “ngi dang pynkhreh ïa kata. Ngim pat lah ban pynkhreh pura hynrei ka kam ka la ïaid shakhmat.
Ha kaba ïadei bad ka jingsoi ïa ka Memorandum of Understanding (MoU) bad ka USTM na ka bynta ban pynïaid ïa ka medical institute da ka Private-Public Patnership Mode, ka Dr. Ampareen ka la ong, “haoid, ngi dang ap ïa u Myntri Rangbah ban ai jingbthah shuh shuh ïa ngi halor kane ka kam.”
Ka Myntri ka la ïathuh kyntait ruh ba ka don ka jingpynslem ban shna ïa ki medical colleges hapoh ka jylla.
“Kam don kano kano ka jingpynslem ban shna ïa ki Medical Colleges. Ngi ladep ïathuh ba ngi la buh thong ban pyndei shwa kawei ka Medical College hapoh u snem 2024-25, mynta ka la seisoh. Ngi la ong ba ka Shillong Medical College) lada ka ïaid kumba la thmu, ngin sdang noh ïa ka samoi pule jong u snem 2025-26 bad ka Tura Medical College namarba ki don katto katne ki daw, ngi kyrmen ba ngin sa lah ban sdang noh shen ha ka samoi pule jong u snem 2027-28,” ka la ong.
Ka Myntri ka la kyntiat ban kynthoh eiei halor ka jingmih ka jingïakawang ktieh hapdeng ka USTM bad u Myntri Rangbah ka Jylla Assam u Himanta Biswa Sarma.
