Shillong, ïaïong 01: Kumba 40 pyrton ki pulit jong ka sorkar pdeng kin sa ka wan ban pahara hapoh ka jylla Meghalaya ban pynthikna ba kan don ka shongsuk shongsaiñ ha kaba ïadei bad ka jingpynlong ïa ki Lok Sabha election, ka ban long ha ka jylla ka ban sdang naduh ka 19 tarik mynta u bnai.
ïa kane la ïathuh da u chief electoral officer (CEO) ka jylla u Dr BDR Tiwari, uba la ong ba ka jylla ka la ïohpdiang kumba 40 pyrton ki pulit napoh ka sorkar pdeng ki ban pahara na ka bynta ka ilekshon ne ki Companies of central armed police forces (CAPFs).
Na kine, kumba san pyrton jong ki pulit CAPF ki la dep don lypa ha ka jylla, da kaba ong ba ïa kiwei pat yn sa pynpahara katkum ka rukom pyrkhat kam kaba la dep pynbeit lypa.
Na ka liang u Tiwari u la ïathuh ba baroh ki kam la dep ban pynbeit kiba la long katkum ka aiñ kiba la dep ïoh ruh ïa ki jingpyntip katkum ki jingdonkam jong ka kam.
“Ngi la dep ruh ban shim khia ha kaba ïadei bad ki kam khappud ha shwa ban pynlong ïa ka election. Ka Election Commission of India (ECI) ka la dep ruh ban pynmih ïa ki jingbthah kiba donkam sha ki jylla kiba marjan jong ka jylla,” u la ong.
Shuh shuh u la ïathuh ba kumba long haduh mynta ki la don kumba 2 tylli ki jingujor ha kaba ïadei bad ka jingpynkheiñ ïa ka model code of conduct.
