Shillong, Jylliew 13: Ka Muaythai Association of Meghalaya ka la jied ïa ki 40 ngut ki khynnah ïalehkai kyntup shynrang bad kynthei kiban leit ïashim bynta sha ka National Muaythai Championship ka ban long ha Deweas Indoor Stadium ha Madhya Pradesh kaban sdang naduh ka 16 tarik haduh ka 22 tarik Jylliew 2022.
Ki 40 ngut ki nongïalehkai kin sa ïashim bynta ha la ki jong ki kyrdan ba kynthup ha ka Sub Juniors, Juniors bad Seniors. Ka Association ka la jied ruh 5 ngut ki official kiban synrang lang ïa kitei ki nongïalehkai. Ka Association ka pynpaw ïa ka jingkhublei ïa u Myntri ka tnad ïalehkai u Bah Banteidor lyngdoh, bad kyrkhu kyrdoh ïa ki nongïalehkai ba kin ïoh ïalehkai ban wanrah nam bad burom ïa la ka jong ka jylla.
La noh synñiang ruh da ka song pisa sha ki khynnah ïalehkai kiban leit aireng sha katei ka championship ha Madhya Pradesh. Na liang u Bah A.Sun President ka Association u la ïathuh ba ki nongjop na katei ka National Muaythai Championship na ki Junior khynthei bad shynrang kin shah jied sha ka Youth World Muaythai Cham-pionship ka ban long ha Malaysia naduh 9 tarik haduh 21 tarik Nailar 2022. Ka Association ka la pynpaw ïa ka jing sngewnguh shikatdei ïa ka jing sbun mynsiem u Myntri ka tnad ïalehkai uba long lakloi ban ïarap na bynta ban kyntiew ïa ki kam ïalehkai hapoh ka jylla.
